Մայիսի 27-ին «Մենք ենք տերը մեր երկրի» նախաձեռնության անդամները հավաքվեցին Ազատության հրապարակում, որտեղից երթով շարժվեցին Մաշտոցի պողոտայով՝ դեպի «Երեւան սիթի»:
Միջոցառման տարեց անդամներից մեկը առաջարկեց ոչինչ չանցկացնել, որովհետեւ Վերջին զանգի օրն է ու համերգ է նախատեսված Ազատության հրապարակում ու պետք չէ խանգարել երեխաներին: Տարեց ակտիվիստը իբրեւ միջոցառման կազմակերպիչ վկայակոչեց Ժիրայր Սեֆիլյանին, սակայն երթը գլխավորած ակտիվիստներից Ներսես Գեւորգյանն ասաց, որ երթը Սեֆիլյանի հետ կապ չունի, եւ կազմակերպիչներ չունի:
Նա Aravot.am-ի հետ զրույցում նշեց իրենց հավաքի նպատակը:
«Խնդիրը գլոբալ իմաստով Արեւմուտք-Ռուսաստան բախման մեջ է, որի կետերից մեկը, որ Ռուսաստանը փորձում էր իրականացնել Ուկրաինայում, իր համար շատ ռիսկային էր, քանի որ կարող էր տարածվել Ռուսաստանի ներսում ու պայթյուն տեղի ունենար: Դրա համար փոխադրեց դեպի Սիրիա, այնտեղ էլ տեսավ, որ սահմանափակ գործողություններով օգուտ չի ստանա եւ ընդամենը կարող են ամերիկացիների հետ նույն սեղանի շուրջ նստել: Այժմ Ռուսաստանը պատերազմի նոր օջախ է փնտրում, եւ առաջինը, որ իրենց մտքով անցել է՝ բախումը տեղափոխել Ղարաբաղ եւ Արցախում պատերազմ հրահրել: Դրա համար էլ 2013-ից սկսած զենքի մատակարարումները դադարեցրել են, ակտիվորեն նույն ժամանակաշրջանում զինում են Ադրբեջանին»,-ասաց Ներսես Գեւորգյանը:
Կարդացեք նաև
Նրա ձեւակերպմամբ, մեր երկրի իշխանությունները ռուսական վասալներ են, իսկ Ռուսաստանն էլ ցանկանում է ցեղասպանություն կազմակերպել: Ըստ ակտիվիստի, այս համատեքստում միակ հակազդող ուժը տվյալ պարագայում ժողովուրդն է:
Նշենք, որ երթը բավականին սակավամարդ էր, Երևանի փոխոստիկանապետ Վալերի Օսիպյանը եւս Ազատության հրապարակում էր: Նա միջոցառման մասնակիցներին ասաց, որ երթն արտոնված չէ, բայց ոստիկանությունը պատրաստ են ուղեկցել նրանց ողջ ընթացքում, միայն թե մասնակիցները չխանգարեն քաղաքացիների ազատ տեղաշարժին եւ շարժվեն հետիոտնի համար սահմանված հատվածներով:
Երթի փոքրաթիվ մասնակիցները հասան մինչեւ Մաշտոցի պողոտայում գտնվող «Երեւան սիթի», նրանց շուկայի պատասխանատուն ներս չթողեց: Ասաց, որ որպես քաղաքացի կարող են ներս մտնել ու գնումներ կատարել, բայց բարձրախոսով չի թողնի:
«Մենք ենք տերը մեր երկրի» նախաձեռնության ակտիվիստ Ներսես Գեւորգյանը ստիպված շուկայի մուտքի մոտ տեսախցիկների առաջ կարդաց իրենց թռուցիկը՝ «Օլիգարխների թալանածը՝ բանակին» խորագրով, որտեղ ի թիվս այլ պահանջների Արտաքին գործերի, պաշտպանության նախարարների, ԶՈՒ շտաբի պետ Յուրի Խաչատուրովի եւ նրա տեղակալ Հայկազ Բաղմանյանի հրաժարականներն էին շոշափված: Նրանք նաեւ պահանջում էին՝ օլիգարխներին պարտավորեցնել $5 մլն-ի չափով գումար վճարել պետբյուջե:
Մի խոսքով, որպես այդպիսին, հանրահավաք չկայացավ, պատճառների մասին մասնակիցները հրաժարվեցին խոսել, մինչդեռ ավելի վաղ նախատեսված էր մոտ մեկ ժամ տևողությամբ հանրահավաք անցկացնել Ազատության հրապարակում, որտեղ ելույթ պետք է ունենային Հանրային խորհրդի անդամներ Անդրեաս Ղուկասյանը, Թամար Հովհաննիսյանը, Գարեգին Չուգասզյանը եւ ուրիշներ:
Գոհար ՀԱԿՈԲՅԱՆ
