Մայիսի 30-ին «Հայելի» ակումբի հյուրերն էին քանդակագործ Ֆերդինանտ Առաքելյանը եւ գրականագետ Ազատ Եղիազարյանը: Նրանք խոսեցին Հռոմի պապի հունիսի 24-26 –ը Հայաստանում կայանալիք այցից: Հիշեցնենք, որ Հռոմի սրբազան քահանայապետ Ֆրանցիսկոս պապի այցի կարգախոսն է «Այց առաջին քրիստոնյա երկիր»:
Գրականագետ Ազատ Եղիազարյանը անչափ կարեւորում է այդ իրադարձությունը: «Գործ ունենք արդարության ու մարդասիրության խորհրդանիշի հետ, շատ լավ բան է, մեր հասարակությունը հաստատ կողջունի այս այցը մեր երկիր»,-ասում է նա:
Քանդակագործ Ֆերդինանտ Առաքելյանը հատուկ է պատրաստվել այդ այցին եւ ուզում է յուրօրինակ ձեւով իր երախտագիտությունը հայտնել. «Երբ Հռոմի պապն ընդունեց Ցեղասպանությունը, ես մտածեցի, որ իրեն նվիրված մի գործ պետք է անեմ: Եվ ահա երկու ամիս է աշխատում եմ այդ գործի վրա: Ողջ իմաստը մեկ րոպե լռությունն է»:
Արվեստագետի 4 մետր բարձրությամբ կոմպոզիցիայի կենտրոնում Կենաց ծառն է: Նա այսպես է մեկնաբանում իր աշխատանքը. «Կոմպոզիցիան խորհրդանշում է, որ մենք շարունակում ենք ապրել, ծաղկել ծառի նման, ու աշխարհը եկել է մեկ րոպե լռությամբ հարգելու ոչ միայն Հայոց ցեղասպանությունը, այլեւ Ռուանդայի, Կամբոջիայի, Վիետնամի ու մյուս ժողովուրդների ցեղասպանությունները»:
Կարդացեք նաև
Ֆերդինանտ Առաքելյանը մի քիչ վիրավորված է հրեաներից, ասում է իրենց Հոլոքոստին նվիրված հուշարձան է կանգնեցված Հայաստանում, սակայն հրեաները չեն ընդունել մեր ցեղասպանությունը: Առաքելյանի ձեւակերպմամբ, ի վերջո, հաղթողը մեկն է՝ քաղաքակրթությունը:
«Ամբողջ Հայաստանը մշակութային է, ամեն ինչ էլ կարելի է ցույց տալ Հռոմի պապին, բայց կուզեի, որ անպայման այցելեր Հայոց ցեղասպանության թանգարան ինստիտուտ: Ինչ վերաբերում է իմ արձանին, ուզում եմ, որ մեր ազգի կողմից նվիրվի իրեն, որպես Հայ ժողովրդի կողմից երախտիքի խոսք: Ամսի 15-ին այն կավարտեմ ու մի օր էլ ցուցահանդեսում կներկայացնեմ»,- ասում է քանդակագործը:
Ազատ Եղիազարյանը, որը միակն է, որ տեսել է Ֆերդինանտ Առաքելյանի աշխատանքը, վստահեցնում է՝ շատ լավ է ստացվել, համամարդկային մարդասիրական էության մեջ է արված:
Նա նաեւ համոզված է՝ այցն այնպես պետք է կազմակերպվի, որ Հռոմի պապը մի բանում հաստատ համոզվի. «Չնայած փոքր է հայ ժողովուրդը, բայց այնպիսի՜մշակույթ ունի, որի էությունը հումանիզմն է: Պետք է նրան, օրինակ, «Սասունցի Դավիթ» էպոսը ներկայացնենք, որի մեջ մարդկայնության գաղափարն է շեշտադրված: Եթե թուրքական էպոսում ասվում է, որ տղամարդը տղամարդ չէ, եթե վիզ չի կտրել, ապա մեր էպոսի հերոսները նույնիսկ կենդանու չեն վնասում»:
Գոհար ՀԱԿՈԲՅԱՆ
