«Մեկ ու կես տարի է, ինչ ՀՀ-ն անդամակցում է Եվրասիական տնտեսական միությանը, բայց արդեն իսկ ակնհայտ են արդյունքները: Դա են փաստում ՀՀ եւ հարեւան երկրների արտաքին առեւտրի եւ մակրոտնտեսական ցուցանիշները: Ակնհայտ է, որ ՀՀ-ի` ԵՏՄ-ին անդամակցելը ճիշտ քաղաքական որոշում էր»,-հունիսի 4-ին Ծաղկաձորի «Ոսկու աշխարհ» հյուրանոցային համալիրում կազմակերպված «Եվրասիական Տնտեսական Միություն. Հայաստան-համագործակցություն» ամենամյա տնտեսական ֆորումի ժամանակ լրագրողների հետ զրույցում ասաց ՀՀ միջազգային տնտեսական ինտեգրման և բարեփոխումների նախարարի տեղակալ Սուրեն Կարայանը:
Նրա խոսքով` արտահանման եւ ներմուծման մասով ՀՀ-ի դիրքերն ավելի բարենպաստ են, քան Վրաստանինը եւ Մոլդովայինը. «Այս տարվա առաջին եռամսյակում 6 տոկոս տնտեսական ակտիվություն գրանցվեց: Նման ցուցանիշ չկա մեր որեւէ հարեւան երկրում: Որպեսզի համոզվենք, թե ինչ արդյունքներ ենք ստացել ԵՏՄ-ին միանալով, նշեմ, որ արտաքին առևտրի ազատականացման ցուցանիշներով` «Դուինգ Բիզնես»-ի վերլուծություններով` ՀՀ-ն 58-ից հայտնվել է 29-րդ հորիզոնականում: Սա արդեն իսկ մեծ ցուցանիշ է: Աճել են նաեւ ծառայությունների եւ ապրանքատեսակների արտահանման ծավալները»:
Սուրեն Կարայանը մեկնաբանեց նաեւ ՊԵԿ փոխնախագահ Արմեն Ալավերդյանի հայտարարությունը, թե ՀՀ պետբյուջեն ԵՏՄ անդամակցությունից վնաս է կրել. «Անդամակցելով ԵՏՄ-ին` ՀՀ-ն պետական բյուջեի եկամուտների մասով կորուստներ չի ունեցել, հակառակը: Կատարեք համապատասխան հարցումներ եւ կհամոզվեք»:
Լուիզա ՍՈՒՔԻԱՍՅԱՆ
