Հայկ Խանումյանի կինը` Դիանա Մովսիսյանը Aravot.am-ի հետ զրույցում տեղեկացրեց, որ իրենք այսօր ժամը 13:00-ի սահմաններում Հայկ Խանումյանին ծեծի ենթարկելու մասին հաղորդում ներկայացրել են ԼՂՀ ոստիկանություն:
Հիշեցնենք, որ Լեռնային Ղարաբաղի Ազգային ժողովի ընդդիմադիր «Վերածնունդ» խմբակցության ղեկավար, «Ազգային վերածնունդ» կուսակցության նախագահ Հայկ Խանումյանն այսօր ծեծի էր ենթարկվել Ստեփանակերտի կենտրոնական հրապարակում:
Այս առիթով ԼՂՀ նախագահի մամուլի խոսնակ Դավիթ Բաբայանը նշել էր. «Իրեն լավ ճանաչելով, կարող եմ ասել`միգուցե ինչ-որ անձնական խնդիր է եղել: Բայց իրավական տեսանկյունից`որեւէ մեկը ոստիկանություն չի դիմել: Որպես մարդ կարող եմ միայն իմ անձնական կարծիքն ասել` դժբախտաբար իրեն լավ ճանաչելով, իմանալով, որ մարդկանց կարող է անպատվել եւ այլն… հնարավոր է նման բան է եղել: Բայց իրավական ոչ մի բան չկա, ոստիկանություն նման դիմում չի եղել: Ինչի՞ մասին խոսենք, եթե չկա փաստ»:
Մինչդեռ մեզ հետ զրույցում Հայկ Խանումյանի կինը պնդեց, որ հաղորդում ներկայացրել են ոստիկանություն: Նա մանրամասնեց. «Ժամը 13.00-ի սահմաններում հաղորդում ենք տվել: Այս պահին այն քննում է ոստիկանությունը: Իսկ թե ինչ է ասում Դավիթ Բաբայանը, չեմ պատրաստվում մեկնաբանել. նա ընդհանրապես ադեկվատության խնդիր ունի»:
Կարդացեք նաև
Տաթև ՀԱՐՈՒԹՀՈՒՆՅԱՆ
Լուսանկարը՝ «Ազատություն» ռադիոկայանի: Լուսանկարում Հայկ Խանումյանի պիջակն է՝ ծեծից հետո: