Վերջին 10-15 օրերին ակտիվ ռազմական գործողություններ են ընթանում Լաթաքիայում և Հալեպում, որտեղ ռմբակոծվում են նաև հայկական թաղամասերը։ Փետրվարին Սիրիայում հաստատված հրադադարը փաստացիորեն չի գործում:
Ըստ արաբագետ Արմեն Պետրոսյանի՝ հրադադարն օգտագործվում է մի շարք կառույցների կողմից ինքնակազմակերպվելու և Սիրիայի հյուսիսում նոր գրոհներ կազմակերպելու նպատակով: Արաբագետը թուրքական ձեռագիր է տեսնում մասնավորապես քրդական ու հայկական թաղամասերի դեմ ուղղված գործողություններում։
«Իսլամական պետություն» ահաբեկչական խմբավորման մրցակից «Ջաբաթ ան-Նուսրա»-ն ինչո՞ւ պետք է ռազմական գործողություններ ծավալի քրդերի դեմ, որոնք գործում են «Իսլամական պետության» դեմ: Կամ ինչո՞ւ պետք է նույն կառույցը ռազմական գործողություններ իրականացնի սիրիական բանակային ստորաբաժանումների դեմ, որոնք կռվում են «Իսլամական պետության» դեմ»,- «Արմենպրես» լրատվական գործակալությունում այսօր լրագրողների հետ հանդիպման ժամանակ ասաց Արմեն Պետրոսյանը:
Արաբագետ Սարգիս Գրիգորյանը հավանական է համարում, որ ստեղծված իրավիճակում Թուրքիան Սիրիայում կգնա միակողմանի ռազմական գործողությունների, հատկապես եթե քրդական դիրքերն էլ ավելի ամրապնդվեն:
Կարդացեք նաև
Նրա կարծիքով՝ Սիրիայի հյուսիսում «Իսլամական պետության» դեմ իրականացվող ռազմական գործողությունները թույլ են տալիս, որ խմբավորումը կտրվի Թուրքիայի հետ սահմանից։
«Գաղտնիք չէ, որ այդ սահմանից էր գալիս «Իսլամական պետությանն» ուղղված մարդկային, ֆինանսական ու ռազմական աջակցությունը: Սահմանից կտրվելով, փաստորեն, «Իսլամական պետությունը» զրկվում է այդ աջակցությունից։
Խմբավորման դեմ հյուսիսում ծավալվող գործողությունները նույնպես կարևոր են. զրկվելով իր վերահսկողության տակ գտնվող որոշ տարածքներից՝ «Իսլամական պետությունը» քաշվում է անապատ, որտեղ չի կարող պատսպարվել բնակչության թիկունքում։ Նրա դեմ ռազմական պայքարն առավել արդյունավետ կարող է իրականացվել»,- նկատեց արաբագետը։
Սիրանուշ ՀԱՅՐԱՊԵՏՅԱՆ
