Շանհայի համագործակցության կազմակերպությունը, որտեղ երկխոսության գործընկերոջ կարգավիճակ ունի նաև Հայաստանի Հանրապետությունը, նշում է հիմնադրման 15-ամյակը։ Այս մասին տեղեկացնում է ռուսական «ՏԱՍՍ» լրատվական գործակալությունը։
Կազմակերպության համար առանցքային նշանակություն ունի ընթացիկ տարվա հունիսի 23-24-ը Տաշքենդում կայանալիք գագաթնաժողովը, որտեղ, կազմակերպության գլխավոր քարտուղարի խոսքերով, կհստակեցվի Շանհայի համագործակցության կազմակերպության հետագա զարգացման ծրագիրը։
Խոսելով Տաշքենդում կայանալիք գագաթնաժողովի մասին` կազմակերպության գլխավոր քարտուղար Ռաշիդ Ալիմովն ասել է. «Կազմակերպության անդամ պետությունների նախագահները կհավաքվեն Ուզբեկստանի մայրաքաղաքում, որպեսզի քննարկեն տարածաշրջանային և միջազգային քաղաքականության օրակարգային հարցերը»։
Տեղեկացնենք, որ Շանհայի համագործակցության կազմակերպության հետ տարբեր ձևաչափերով առնչվում է աշխարհի 18 պետություն, որոնց բնակչության թիվը կազմում է մարդկության 44%-ը։ Կազմակերպության լիիրավ անդամներն են Ղազախստանը, Ղրղզըստանը, Չինաստանը, Ռուսաստանը, Տաջիկստանն ու Ուզբեկստանը։ Կազմակերպությունում դիտորդի կարգավիճակ ունեն Աֆղանստանը, Բելառուսը, Հնդկաստանը, Իրանը, Մոնղոլիան և Պակիստանը։ Հայաստանը, Ադրբեջանը, Կամբոջան, Նեպալը, Թուրքիան և Շրի Լանկան էլ համարվում են երկխոսության գործընկեր պետություններ։
