Ապրիլյան դեպքերից հետո հունիսի 17-18-ը Երևանում անցկացվելիք ամենամյա «Դիջիթեք» բիզնես ֆորումի ուշադրությունը սևեռված կլինի ռազմարդյունաբերության հարցերին:
Այս մասին այսօր «Էլիտ պլազա» բիզնես կենտրոնում լրագրողների հետ հանդիպման ժամանակ ասաց Ինֆորմացիոն տեխնոլոգիաների ձեռնարկությունների միության (ԻՏՁՄ) նախագահ Ալեքսանդր Եսայանը:
«ԻՏՁՄ-ն ակտիվորեն զբաղվում է այդ հարցով: Մոտ 300 մասնագետ ունենք, որոնք պատրաստ են աջակցել ռազմարդյունաբերության զարգացմանը: «Դիջիթեք» բինզես ֆորումի շրջանակներում կունենանք քննարկումներ, առաջարկներ, որոնք, հուսով ենք, հետագայում կյանքի կկոչվեն»,- ասաց Ալեքսանդր Եսայանը:
ԻՏՁՄ-ի գործադիր տնօրեն Կարեն Վարդանյանի խոսքով՝ Հայաստանում կայուն ռազմարդյունաբերական ոլորտ ունենալու համար անհրաժեշտ է մի քանի տարում կրկնապատկել, եռապատկել տեղեկատվական տեխնոլոգիաների (ՏՏ) ոլորտի մասնագետների թիվը:
Կարդացեք նաև
«Մինչև 2022-2023 թվականն անհրաժեշտ է առնվազն 50 հազար աշխատող ունենալ ոլորտում,- ընդգծեց նա,- ֆորումի ընթացքում կփորձենք հասկանալ՝ ինչ լրացուցիչ ենթակառուցվածքների ստեղծման անհրաժեշտություն կա, ինչպես պետք է կառավարենք մեր ունեցած տեխնոլոգիական, կրթական, գիտական ռեսուրսները, ինչ քայլեր ձեռնարկենք միջնաժամկետ ու երկարաժամկետ հեռանկարում լուրջ ռազմարդյունաբերություն ունենալու համար, որ որևէ մեկի մտքով չանցնի հարձակվել մեզ վրա»,- ասաց Կարեն Վարդանյանը:
Նրա փոխանցմամբ՝ արդեն 9-րդ անգամ անցկացվող ֆորումի օրակարգն առավել բազմազան կլինի՝ սկսած մարդկային ռեսուրսների կառավարման հարցերից մինչև կիբերանվտանգությանը վերաբերող խնդիրներ:
Տեղեկատվական անվտանգության փորձագետ Սամվել Մարտիրոսյանի գնահատմամբ՝ Հայաստանը հայտնվել է մի իրավիճակում, երբ մի կողմից կիբերհանցագործությունը դառնում է սպառնալիք ողջ երկրի անվտանգության մակարդակով, մյուս կողմից՝ անհրաժեշտ է պաշտպանության նպատակով կիրառել սեփական կիբերզենքերը:
«Եկել է ժամանակը, որ ՏՏ-ն չլինի զուտ գերակա ճյուղ, այլ ոլորտ, որը մտնում է մեր տուն ու կիրառվում ամեն տեղ: Մենք արդեն ունենք նմանատիպ փորձեր: 2015-ը կարելի է համարել տարեթիվ, երբ ՏՏ-ն մտավ մեր արտադրության մեջ, դրա լուծումներն սկսեցին փոխել մեր կենցաղը: Ժամանակն է, որ այն դառնա կարևոր ուղղություն, ինչպես նաև ծառայի պետական անվտանգության ապահովմանը»,- ասաց Սամվել Մարտիրոսյանը:
Սիրանուշ ՀԱՅՐԱՊԵՏՅԱՆ
