«Քաղաքացիական հասարակությունը չստորագրեց, բայց նրանք հանդես եկան հայտարարությամբ, որտեղ այս համաձայնությունը գնահատում են դրական: Ուրեմն՝ նրանք ինչ-որ ձեւ գտան մասնակցելու կոնսենսուսին»,- հունիսի 17-ին «Փաստարկ» մամուլի ակումբում լրագրողների հետ հանդիպման ընթացքում ասաց ԱԺ պատգամավոր Լեւոն Զուրաբյանը:
Ըստ նրա, քաղաքական առումով կոնսենսուսը կարելի է գրեթե կատարյալ համարել. «Դուք գիտե՞ք որեւէ լուրջ քաղաքական ուժ, որը դեմ է այս համաձայնությանը, դեմ է, որ այս համաձայնության մեջ ընդգրկված բաղադրիչները իրականացվեն: Ես չգիտեմ»:
«Ժառանգություն» կուսակցության փոխնախագահ Արմեն Մարտիրոսյանը Aravot.am-ի հետ զրույցում ասել էր, որ ընդդիմությանը ոչ ոք չէր լիազորել կիսաճշմարտության տակ ստորագրել: Aravot.am-ը Լեւոն Զուրաբյանին խնդրեց անդրադառնալ այս տեսակետին:
«Իսկ ո՞վ է իրենց անունից ստորագրել, ոչ ոք իրենց անունից ոչ մի փաստաթղթի տակ չի ստորագրել, որ համարվի, որ իրենք պատվիրակել են կամ չեն պատվիրակել: Մենք ստորագրել ենք փաստաթուղթը միայն Հայ ազգային կոնգրես խմբակցության անունից: Իսկ «Ժառանգությունը» ուներ այդ հնարավորությունը մասնակցելու այդ ձեւաչափով քննարկումներին, քանի որ նա ուներ խմբակցություն, այսինքն՝ այդ հնարավորությունը նա ունեցել է:
Կարդացեք նաև
«Ժառանգությունը» կարող էր գալ, մասնակցել այդ ձեւաչափին, ներդրում ունենալ, փորձել ստանալ ավելի շատ, քան մենք կարողացանք ստանալ, բայց իրենք հրաժարվեցին մասնակցությունից, ինչը մենք հարգում ենք, դա իրենց իրավունքն է: Դե հիմա իրենք չեն մասնակցել, իրենց ավանդը չեն ներդրել դրա մեջ, էլի խնդիր չկա, որովհետեւ ձեռք բերվածը, ձեռք չի բերվել մի քաղաքական ուժի համար, դա ձեռք է բերվել բոլոր քաղաքական ուժերի համար, այդ թվում նաեւ «Ժառանգության»,- ասաց նա:
Ամի ՉԻՉԱԿՅԱՆ
