«Հնչակյան կուսակցության 20 կախաղանները միայն մեր կուսակցությանը չեն պատկանում. իրենք պատկանում են մեր բովանդակ հայ ժողովրդին: Նրանք և մնացած բոլոր նահատակները արժանի են հիշման, մեծարման, և իրենք իրենց քաղաքական պատգամն են տվել մեր ժողովրդին: Այս միջոցառումը այդ քաղաքական պատգամի մասին է»,- Aravot.am-ի հետ զրույցում ասաց ՍԴՀԿ Հայաստանի վարչության ատենապետ Նարեկ Գալստյանը:
«Առնո Բաբաջանյան» համերգասրահում տեղի ունեցավ կախաղան բարձրացված Հնչակյան 20 նահատակների ոգեկոչման երեկո:
Միջոցառմանը ներկա Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանը ոգեկոչեց 20 նահատակների հիշատակը` ելույթի ժամանակ նշելով, որ նրանք հավատում էին` 20-ից հետո հազարավորներն են գալու:
Կարդացեք նաև
Ելույթներով հանդես եկան ՍԴՀԿ Կենտրոնական վարչության անդամ Սեդրակ Աճեմյանը և Նարեկ Գալստյանը: Նարեկ Գալստյանը նշեց, որ իրենց քաղաքական ղեկավարները կախաղան բարձրացվեցին, որովհետև ցանկանում էին վերացնել Թալեաթին, Էնվերին Ջեմալին՝ հասկանալով և գիտակցելով, որ առաջիկայում տեղի է ունենալու մեծ արհավիրքը:
Նա նաև անդրադարձավ երկրում առկա ներքին և արտաքին քաղաքական խնդիրներին. «ՍԴՀԿ-ն իր վճռական «այո»-ն է ասել սահմանադրական բարեփոխումներին, մեզ համար երկրորդական էր այն, թե գործող իշխանական էլիտայի համար ինչ կարճաժամկետ խնդիր է լուծվում, մենք եղել ենք ու կլինենք խորհրդարանական կառավարման համոզված կողմնակից: Սրա հետ մեկտեղ իբրև պատասխանատու քաղաքական ուժ` մենք չենք կարող չխոսել առկա բացթողումներից: Ոչ ոքի համար նորություն չէ, որ պետական համակարգում կա լայնածավալ կոռուպցիա, ոչ ոքի համար գաղտնիք չէ, որ երկրում օլիգարխիան սերտաճել է իշխանություններին, որի հետևանքով էլ ստեղծվում են հստակ բիզնես շահեր և մենաշնորհներ»: Կուսակցության ատենապետը հավելեց, որ ՍԴՀԿ-ն մասնակցելու է առաջիկա տեղական ինքնակառավարման և խորհրդարանական ընտրություններին:
Արփի ԿԻՐԱԿՈՍՅԱՆ
