Քրդամետ «Ժողովուրդների դեմոկրատական» կուսակցության հայազգի պատգամավոր Գարո Փայլանը դատի է տվել Ստամբուլում տեղակայված Գերմանիայի հյուպատոսարանի առջև բողոքի ցույց անողներին։ Այս մասին տեղեկացնում է թուրքական «Հաբերլեր» լրատվական գործակալությունը։
Փայլանը դատական հայց է ներկայացրել շուրջ 200 քաղաքացու հանդեպ, որոնք Գերմանիայի հյուպատոսարանի դիմաց կազմակերպված ցույցի ընթացքում ատելություն սերմանող հակահայ կարգախոսներ են վանկարկել և նույն բովանդակությամբ պաստառներ պահել։ Ցուցարարները բողոքում էին 2016թ. հունիսի 2-ին Գերմանիայի Բունդեսթագում ընդունված Հայոց ցեղասպանության ճանաչման մասին բանաձևի ընդունումից։
Ստամբուլի դատախազություն ներկայացած Փայլանը իր հայցը հիմնավորել է հետևյալ կերպ. «Ամենալավ հայը, մահացած հայն է» կարգախոսներ վանկարկելով քայլում էին։ Այդ կարգախոսները ատելության բացահայտ դրսևորումներ են։ Հայց եմ ներկայացնում ատելության և հնչեցված սպառնալիքների վերաբերյալ»։
