Ծանրամարտի միջազգային ֆեդերացիան այս երեք երկրների ծանրամարտի ֆեդերացիաներին կարող է որակազրկել մեկ տարով, եթե 2008 եւ 2012 թվականների օլիմպիական խաղերի դոպինգ նմուշների նորագույն մեթոդներով ստուգման արդյունքները ի հայտ բերեն երեք եւ ավելի դրական արդյունք: Դա կնշանակի, որ այդ երկրների ծանրորդները չեն մասնակցի 31-րդ ամառային օլիմպիական խաղերին: «Այս խիստ որոշումն ընդունվել է Թբիլիսիում կայացած գործկոմի նիստում», – տեղեկացնում է IWF-ի մամուլի ծառայությունը:
Ռուսաստանցիներից դրական արդյունք հայտնաբերվել է Պեկինի եւ Լոնդոնի օլիմպիական խաղերի մասնակիցներ Մարինա Շաինովայի, Նադեժդա Եվստյուխինայի եւ Ապտի Աուխադովի փորձանմուշներում: Առաջին երկուսի կրկնական ստուգումները հաստատվել են, երրորդ ծանրորդի «B» սրվակի բացումը նշանակվել է ավելի ուշ: Նույն պատճառով որակազրկման վտանգ է սպառնում նաեւ Բելառուսի եւ Ղազախստանի ծանրորդներին:
IWF-ն անկախ հանգամանքների հետագա զարգացումից, Ռուսաստանի ծանրամարտի ֆեդերացիայից արդեն վերցրել է Ռիո դե Ժանեյրոյի երկու քվոտա: Հիշեցնենք, որ Ռուսաստանի ծանրորդները նվաճել էին օլիմպիական խաղերի մասնակցության առավելագույն ուղեգրեր. տղամարդկանց՝ 6 եւ կանանց՝ 4:
Աշոտ ՀԱԿՈԲՅԱՆ
Կարդացեք նաև
Լուսանկարը՝ IWF-ի
