Այսօր Գաֆէսճեան արվեստի կենտրոնի «ՀԱՆԴԻՊՈՒՄ ԱՐՎԵՍՏԻ ՀԵՏ» շարքը ներկայացրեց հատուկ երեկո՝ նվիրված հայ մեծանուն քանդակագործ Արտաշես Հովսեփյանի 85-ամյա հոբելյանին:
Գաֆէսճեան արվեստի կենտրոնի ցուցադրությունների գծով տնօրեն Արմեն Եսայանցը Aravot.am-ի հետ զրույցում նշեց, որ չէին կարող չանդրադառնալ և բաց թողնել Արտաշես Հովսեփյանի հոբելյանը.« Մենք բացեցինք Արտաշես Հովսեփյանի Սասունցի Դավիթ որմնաքանդակը հանրության համար, և ինքն անձամբ ներկա էր բացման արարողությանը: Այսօր էլ անդրադառնում ենք նրա հոբելյանին և փորձում հանրությանը ներկայացնել Արտաշես Հովսեփյան քանդակակագործին ոչ միայն այս ստեղծագործության շրջանակներում, այլեւ ընդհանրապես»:
Հիշեցնենք, որ քանդակի պաշտոնական բացումը եղել է թանգարանների միջազգային օրը՝մայիսի 18-ին, իսկ հանրության համար բացվեց մայիսի 21-ին:
Միջոցառման առաջին հատվածում նրանք, ովքեր չէին տեսել քանդակը, հնարավորություն ունեցան տեսնելու, ծանոթանալու ստեղծագործությանը:
Կարդացեք նաև
Այնուհետև արվեստաբան Լիլիթ Սարգսյանը դասախոսության միջոցով ներկայացրեց, թե ինչպիսի քանդակակգործական ժառանգություն է թողել Արտաշես Հովսեփյանը ոչ միայն Երևանում, այլև ողջ Հայաստանի տարածքում:
Aravot.am-ի հետ զրույցում Լ. Սարգսյանը փաստեց, որ շատ ցանկալի կլիներ ավելի մեծ և խորը հետազոտություն արվեր Արտաշես Հովսեփյանի տեղծագործության վերաբերյալ , ինչը որ ընթացքի մեջ է.«Օգտվելով այն առիթից, որ Արտաշես Հովսեփյանի անունը վերջին ամսվա ընթացքում ակտիվորեն արծարծվում է, ցանկացա հիշեցնել, արդիականացնել այն ներդրումը, որ Արտաշես Հովսեփյանը կատարեց 20-րդ դարի երկրորդ կեսին հայ մոնումենտալ քանդակի մեջ և հիշեցնել իշխանություններին, հասարակությանը, Երևանն ունեցել է մի հրաշալի քանդակագործության ավանդույթ, որ մեր քաղաքի դեմքն է կերտել: Արտաշես Հովսեփյանը այդ առանցքային վարպետերից մեկն է եղել»:
Միջոցառման ընթացքում ցուցադրվեց Հարություն Խաչատրյանի հեղինակած «Պոետի վերադարձը» ֆիլմը, որը ներկայացնում է Արտաշես Հովսեփյան քանդակագործին, անհատականությանը, ոչ թե միայն ստեղծագործող, այլ նրա աշխատանքային պրեցեսը:
Արմեն Եսայանցի խոսքով՝ որքան էլ ֆիլմը կոչվում է պոետի վերադարձ , ինչքան էլ անդրադառնում է Ջիվանու կերպարին, այդ կերպարի կերտման ընթացքի միջոցով ցուցադրվում է՝ ինչպիսի մարդ, արվեստագետ է Արտաշես Հովսեփյանը.«Ցույց է տրվում՝ ինչպես է կերտել Ջիվանու արձանը, և ինչպես է այդ արձանը Երևան քաղաքից գնացել հասել Ախալքալաք»:
Վերջում Լիլիթը հավելեց, որ չնայած Արտաշես Հովսեփյանը շատ նշանավոր քանդակագործ է, բայց անբավարար են ուսումնասիորություններն ու առկա հրատարակությունները.«Շատ-շատ հրաշալի կլիներ, որ պատշաճ մակարդակի ծավալով գոնե ալբոմ կամ պատկերագիր՝ իր համապատասխան հետազոտական տեքստով, երբևէ լույս տեսներ»:
Արփի ԿԻՐԱԿՈՍՅԱՆ
