«Գնդեվազի Սուրբ Աստվածածին եկեղեցին (17-րդ դար) անմխիթար վիճակում է. պատերը փլուզվում են, որմնանկարները՝ ջնջվում, շրջակայքն աղբանոցի է վերածվում»,- ահազանգում է Գնդեվազ գյուղի (Վայոց ձորի մարզ) բնակչուհի Մարիաննա Արշակյանը:
«Երբ 2013 թվականի ամռանը գնացի եկեղեցի, այնքան քանդված չէր, որմնանկարները շատ վնասված չէին, իսկ այսօր դրանց մի մասն արդեն չի երևում: Քանդվել են եկեղեցու երկու պատերը, այնտեղ մտնելը վտանգավոր է դարձել. կարող է փուլ գալ: Գյուղի բնակիչներն էլ աղբավայրեր չունենալու պատճառով տարածքը վերածել են աղբանոցի»,- «Տեսակետ» մամուլի ակումբում այսօր լրագրողների հետ հանդիպման ժամանակ ասաց Մարիաննա Արշակյանը:
Մշակույթի նախարարության աշխատակազմի Պատմության և մշակույթի հուշարձանների պահպանության գործակալության Հուշարձանների ու պատմական միջավայրի պահպանության և օգտագործման բաժնի պետ Սուրեն Շաքարյանը նշեց, որ իրենք տեղյակ են խնդրից. «Եկեղեցու մոտակայքում է բնակվում մարզային ծառայության հսկիչը և եկեղեցու վիճակի մասին պարբերաբար տեղեկատվություն է ներկայացնում նախարարություն»:
Շաքարյանի խոսքով՝ եկեղեցին Վայոց ձորի մարզի հուշարձանների պետական ցուցակում ընդգրկված է որպես տեղական նշանակության հուշարձան: Այդ հանգամանքը որոշակի պարտավորություններ է դնում համայնքի ղեկավարի վրա:
«Օրենքով տեղական ինքնակառավարման մարմինն աջակցում է հուշարձանի պահպանությանը: Նման դեպքերում օրենքը թույլ է տալիս նաև հուշարձանի վերականգնում: Այնպես որ, մտահոգվելու դեպքում կարող են անմիջապես նախաձեռնել դրա վերականգնման աշխատանքները, պատվիրել նախագիծ: Մենք պատրաստակամ ենք մասնագետներին հանձնարարել զբաղվել դրանով»,- ասաց Շաքարյանը:
Նա նկատեց, որ Սուրբ Աստվածածնից էլ ավելի վատ վիճակում գտնվող հուշարձաններ կան. «Մեր ցուցակում վթարային վիճակում գտնվող 200-ից ավելի հուշարձաններ են ընդգրկված: Այդ պատճառով ընտրություն է կատարվում է, թե որը առաջին հերթին վերանորոգել»,- նշեց Սուրեն Շաքարյանը:
Սիրանուշ ՀԱՅՐԱՊԵՏՅԱՆ
Լուսանկարները տրամադրել է Մարիաննա Արշակյանը
