2016թ. հունիսի 23-ին կայացած հանրաքվեից հետո պարզ դարձավ, որ բրիտանացիների մեծ մասը ցանկանում է, որ Մեծ Բրիտանիան դադարեցնի անդամակցությունը Եվրամիությանը։ Հանրաքվեից հետո բնակչության շրջանում առաջացել են որոշակի հարցեր, որոնց անդրադարձել է բրիտանական The Independent-ը։
Աղբյուրը նշում է, թե բրիտանացիներին սկսել է անհանգստացնել՝ կարո՞ղ է արդյոք Մեծ Բրիտանիան մասնակցել Եվրատեսիլ միջազգային երգի մրցույթին։ Թեմային անդրադարձել է նաև Մեծ Բրիտանիայի դեռևս գործող վարչապետ Դևիդ Քեմերոնը, որին հարց են ուղղել՝ խնդրելով ասել, թե ո՞րն է եղել վատագույն այն բանավեճը, որ լսել է Եվրամիության անդամակցությանը կողմ և դեմ արտահայտվողների միջև։ Հարցին ի պատասխան, Քեմերոնն ասել է, որ այդ թեմայով իր լսած ամենավատ բանավեճը եղել է այն մասին, թե կարո՞ղ են արդյոք հանրաքվեի արդյունքները ազդել Մեծ Բրիտանիայի մասնակցությանը Եվրատեսիլին։ Շարունակելով միտքը՝ Քեմերոնն ավելացրել է. «Հաշվի առնելով, որ Իսրայելն ու Ադրբեջանը, կամ որևէ այլ պետություն, որն ապրում է Եվրոպայի հարևանությամբ, նույնիսկ Ավստրալիան, կարող է մասնակցել, ես կարծում եմ, որ մենք բավականին ապահով ենք այդ հարցում»։
Աղբյուրը նշում է նաև, որ Եվրամիությունից դուրս գալը որևէ կերպ չի կարող խանգարել, որպեսզի Մեծ Բրիտանիան շարունակի մասնակցել Եվրոպայում հանրահայտ Եվրատեսիլ երգի միջազգային մրցույթին։
