«Բոլոր հիմքերը կան պնդելու, որ գործ ունենք հերթական քաղաքական հետապնդման հետ»,- այսօր ԱԺ նիստի սկզբում Ժիրայր Սեֆիլյանի ձերբակալությանն անդրադառնալով՝ հայտարարեց ՀԱԿ խմբակցության պատգամավոր Նիկոլ Փաշինյանը:
Նա հիշեցրեց, որ դեռեւս 1 տարի 3 ամիս առաջ էր Սեֆիլյանի գործող նախաքննություն արվում, դա դեռ չի ավարտվել, ըստ էության, նախաքննություն չկա էլ ու հիմա երկրորդ քրգործն է հարուցվում. «Ես դատապարտում եմ ՀՀ-ում շարունակվող քաղաքական հետապնդումները, որոնք իրականացվում են քրեական հոդվածների տանիքի տակ: Կարծում եմ, որ ՀՀ շահերից է բխում օր առաջ ազատվել քաղբանտարկյալ ունեցող երկրի պիտակից: Ես դատապարտում եմ Ժիրայր Սեֆիլյանի ձերբակալությունը եւ բոլոր քաղբանտարկյալների՝ բանտում գտնվելը»:
ԱԺ նախագահ Գալուստ Սահակյանը հայտարարությունից հետո արձագանքեց. «Վարման կարգի հետ ընդհանրապես առնչություն չուներ: Չցանկացա վիրավորել ընդհանրապես»:
Զարուհի Փոստանջյանը նույնպես անդրադարձավ Սեֆիլյանի ձերբակալությանը. «Հատկապես այն պարագայում, երբ հայտարարվում է, որ պատրաստ ենք ազատագրել մեր հայրենիքը, ունենք համապատասխան զինված ուժեր եւ մարդիկ, ովքեր պատրաստ են մեկնել առաջին գիծ, այս հայտարարություններից հետո մարդկանց կալանավորում են: Փաստորեն, կալանավորում են մեր հայրենիքի ազատագրումը»:
Կարդացեք նաև
Սամվել Ֆարմանյաննն էլ փոխանցեց Արթիկի բնակիչների անհանգստությունը վերջին աղետից հետո փոխհատուցման ժամկետների վերաբերյալ: Նա խնդրեց Գալուստ Սահակյանին, որ խոսի կառավարության հետ եւ տեղեկացնի, թե օժանդակությունն ինչ ժամկետներում կտրամադրվի:
Հռիփսիմե ՋԵԲԵՋՅԱՆ
