Մալաթիա-Սեբաստիա վարչական շրջանների ընդհանուր իրավասության առաջին ատյանի դատարանում դատավոր Ռոբերտ Պապոյանի նախագահությամբ հունիսի 27-ին շարունակվում էր Հեղինե Դարբազյանի սպանության գործի քննությունը:
Տուժողի իրավահաջորդի ներկայացուցիչ Սեդա Սաֆարյանը ներկայացրեց քաղաքացիական հայցը: Նա ներկայացնելով պահանջը, ասաց, որ թաղման ծախսերը կազմում են 500 հազար դրամ, թաղման եւ թաղման հաջորդ օրը տեղի ունեցած արարողություններին մասնակցել է 300 անձ՝ մեկ հոգին 4 հազար դրամով, ինչը կազմում է 1 միլիոն 200 հազար դրամ, իսկ գերեզմանի վրա կատարված աշխատանքների ծախսերը՝ 300 հազար դրամ: Ընդհանուր նա կողմից պահանջում է 2 միլիոն դրամ:
Պաշտպանական կողմը համարում է, որ դատարանը պետք է հայցը մասնակիորեն մերժի եւ որպես նյութական վնասի բռնագանձման գումար սահմանվի 800 հազար դրամը:
Ամբաստանյալ Արտակ Առաքելյանի ներկայացուցիչ Արշակ Թովմասյանը ասաց, որ կողմերը պարտավոր են ներկայացնել բոլոր ապացույցները, իսկ քաղաքացիական հայցով ոչ մի ապացույց չի ներկայացրել: Կողմը պարտավոր է ապացույցներ ներկայացնել, իսկ կողմի ներկայացրած թվերը ապացուցված չեն:
Կարդացեք նաև
Հիշեցնենք, որ Արտակ Առաքելյանը որսորդական դանակով բազմաթիվ հարվածներով սպանել է նախկին կնոջը՝ 38-ամյա Հեղինե Դարբազյանին:
Սեդա Սաֆարյանը միջնորդեց հարցաքննել Հեղինե Դարբազյանի եղբոր կնոջը՝ Լիլիթ Պետրոսյանին, քանի որ Դարբազյանը բավականին մոտ է եղել նրա հետ: Արշակ Թովմասյանը առարկեց, քանի որ ըստ նրա վկան էական ոչ մի ցուցմունք չի տալու. իր պաշտպանյալը ընդունել է իր մեղքը: Սեդա Սաֆարյանը պնդեց իր միջնորդությունը՝ նշելով, որ մահվանից 15 րոպե առաջ Հեղինե Դարբազյանը հեռախոսազրույց է ունեցել Լիլիթ Պետրոսյանի հետ: Դատարանը բավարարեց միջնորդությունը:
Մինչ Սեդա Սաֆարյանի միջնորդությունը մեղադրողը հայտարարել էր, որ մեղադրանքը փոփոխելու մասին միջնորդությամբ հանդես կգա: Միջնորդությունից հետո նա ասաց, որ ցանկանում է մեղադրանքի շարժառիթը հստակեցնել, սակայն վկայի հարցաքննությունից հետո, այդ միջնորդությամբ հանդես կգա: Դատական նիստը հետաձգվեց, հաջորդ դատական նիստը տեղի կունենա հուլիսի 12-ին:
Ամի ՉԻՉԱԿՅԱՆ
