Լրահոս
Օրվա լրահոսը

Հրանուշ Հակոբյանը ընդունել է Հռոմի Պապի՝ Հայաստան կատարած այցի առթիվ Մերձավոր Արևելքի երկրներից Հայրենիք ժամանած մանուկներին և պատանիներին

Հունիս 27,2016 18:40

Հունիսի 27-ին ՀՀ սփյուռքի նախարար Հրանուշ Հակոբյանը հյուրընկալեց Հռոմի Պապի՝ Հայաստան կատարած այցի առթիվ Մերձավոր Արևելքի երկրներից Հայրենիք ժամանած մանուկներին և պատանիներին:

Սփյուռքից ժամանած պատանիներն ու աղջիկները հունիսի 25-ին ներկա էին գտնվել Երևանի Հանրապետության հրապարակում Հռոմի Պապի մասնակցությամբ տեղի ունեցած էկումենիկ արարողությանը: Սիրիայից, Իրաքից, Լիբանանից, Եգիպտոսից, Արաբական Միացյալ Էմիրություններից, Թուրքիայից, Իսրայելից, Քուվեյթից, Իրանից ժամանած հայորդիներն իրենց հետ բերել էին հող և ջուր: Հռոմի Պապի համար պատրաստվել էր նվեր՝  Արարատ լեռան վրա իջած Նոյյան տապանի մանրակերտը: Խորհրդանշական էր, որ երեխաները իրենց հետ բերած հողով ծածկեցին խաղողի որթի արմատները, իսկ երկու հայրապետները երեխաների բերած ջրով ջրեցին այն:

Նախարար Հրանուշ Հակոբյանը շնորհակալություն հայտնեց երեխաների ծնողներին և ուսուցիչներին, ովքեր, անսալով ՀՀ սփյուռքի նախարարության կոչին, եկել էին Հայաստան:

«Դուք դարձաք բազմամիլիոն Սփյուռքի այն ընտրյալ ներկայացուցիչները, ովքեր Հայրենիքում մոտիկից տեսան Հռոմի Ֆրանցիսկոս Պապին: Պահը իսկապես պատմական էր և հուզումնալի, որովհետև դուք Մերձավոր Արևելքի տարբեր երկրներից եկած այն ընտանիքների ժառանգներն եք, ովքեր 101 տարի առաջ փրկվել են Հայոց ցեղասպանությունից», – նշեց ՀՀ սփյուռքի նախարարը:

ՀՀ սփյուռքի նախարարը երեխաներին կոչ արեց չմոռանալ և կատարել Ֆրանցիսկոս Պապի պատգամները՝ լինել բարի, սիրել մերձավորներին, Հայրենիքը, լավ սովորել: «Ուզում եմ, որ հիշեք նաև Պապի՝ հզոր միտք և քարեղեն հավատ ունենալու մասին հորդորը: Հիշե՛ք և ավելի՛ շատ սիրեք մեր եկեղեցին՝ Մայր Աթոռ Սուրբ Էջմիածինը», -ասաց նախարարը:

Այնուհետև շնորհակալական խոսքով հանդես եկան երեխաները: Լիբանանից եկած 9-ամյա Քրիստափոր Հաբիբյանն ասաց. «Ես չէի կարող պատկերացնել, որ հենց իմ Հայրենիքում բախտ կունենամ տեսնել Պապին: Ես ուզում եմ դառնալ Վարդապետ:  Ինձ համար անմոռանալի րոպեներ ապրեցի»: Եգիպտոսից ժամանած Թինա Մազլումյանը նշեց, որ Հռոմի Պապից խնդրել է աղոթել աշխարհի խաղաղության համար: Իսրայելից եկած Պերճ Քեչուկյանը հավելեց. «Շնորհակալություն ՀՀ սփյուռքի նախարարությանը, որ Հռոմի Պապի հետ հանդիպման բացառիկ առիթ ընձեռեց»:

Հանդիպման ավարտին մանուկները խոստացան առավել հաճախ գալ Հայաստան, ճանաչել Հայրենիքը, հայրենի մշակույթն ու ավանդույթները և պահպանել կապը հայրենիքի հետ:

ՀՀ սփյուռքի նախարարություն

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Ամենաընթերցված

Օրացույց
Հունիս 2016
Երկ Երե Չոր Հնգ Ուրբ Շաբ Կիր
« Մայիս   Հուլ »
 12345
6789101112
13141516171819
20212223242526
27282930