Գրականագետ Դավիթ Գասպարյանն Aravot.am-ի հետ զրույցում ասաց, որ անչափ տպավորված է Հռոմի Ֆրանցիսկոս պապի հայաստանյան այցից: «Ուղղակի փառահեղ էր, Հռոմի պապը Չարենց, Ներսես Շնորհալի հնչեցրեց, համաշխարհային մտքի ուշադրությունն ուղղեց մեր վրա…Շատ կարեւոր էր նրա այցը նաեւ Խոր Վիրապ, որովհետեւ հենց Խոր Վիրապում ճգնել է Գրիգոր Լուսավորիչը»,-նշեց պարոն Գասպարյանը:
Նա նաեւ հիշեց, թե ինչպես էր Պապը 2015 թ ապրիլի 12-ին Վատիկանի Սուրբ Պետրոսի տաճարում Հայոց Ցեղասպանության 100-ամյա տարելիցին նվիրված սուրբ պատարագին, Սուրբ Գրիգոր Նարեկացուն հռչակել Տիեզերական եկեղեցու վարդապետ:
«Մենք անընդհատ ասում ենք, որ քրիստոնեությունը պետական կրոն հռչակած առաջին ժողովուրդն ենք, ու այդ ասածը մնում է միայն մեր մեջ: Իսկ Հռոմի պապի ասածը, կարծում եմ, ամբողջ աշխարհում կունենա իր արձագանքը»,-վստահ է գրականագետը:
Նրա ձեւակերպմամբ, պարկեշտության, ժուժկալության իսկական խորհրդանիշ Հռոմի պապը այսօրվա քաղքենիացող կյանքում օրինակելի ապրելու խորհրդանիշ է, այլ հարց է՝ մերոնք նրանից օրինակ կվերցնե՞ն, թե՞ ոչ:
Կարդացեք նաև
Մի դրվագ էլ հիշեց Դավիթ Գասպարյանը. «ժամանակին մամուլում շատ գրվեց, թե ինչպես էր Հռոմի պապը մտել օպտիկական խանութ եւ ոչ թե նոր ակնոց էր գնել իր համար, այլ տվել էր , որ իր հին ակնոցը նորոգեն»:
Գոհար ՀԱԿՈԲՅԱՆ
