Ազատության հրապարակում Ամանորի գիշերը ոստիկանի նկատմամբ բռնություն կիրառելու մեջ մեղադրվող ակտիվիստ Գեւորգ Սաֆարյանի գործով հարցաքննվող ոստիկաններին փաստաբան Տիգրան Հայրապետյանը բաժանել է երկու խմբի:
«Առաջին տեսակն այն է, որ գալիս ու կրկնում է այն, ինչ կա մեղադրական եզրակացության մեջ, որ իբրեւ թե մի քաղաքացի ոտքով հարվածել է Գեղամ Խաչատրյանի աճուկին, որ երկրորդ անգամ է նա փորձել հարվածել, Գեղամ Խաչատրյանը նրան է հարվածել. Սա ասում են, որ մաքրեն Գեղամ Խաչատրյանին, որ իբրեւ թե նա առանց պատճառի չի հարվածել քաղաքացիներին: Երկրորդ տեսակը համեմատաբար ավելի ազնիվ ու ասում են՝ չեն նկատել այդ հարվածը: Ինչպես է այդ տղան հարվածել Գեղամ Խաչատրյանին ու ինչպես է Գեղամ Խաչատրյանը հարվածել նրան, բայց բոլորը ցուցմունք են տալիս Գեղամ Խաչատրյանի դեմ, ասում են՝ տեսել են՝ ինչպես է Գեւորգը հարվածել»,- ասաց փաստաբանը:
Փաստաբանի համար այս գործում ամենազավեշտալին այն է, որ բոլոր ոստիկանները պնդում են, որ Գեղամ Խաչատրյանին հարվածելու պահը տեսել են տեսանյութում, բայց տեսանյութում այդպիսի դրվագ ընդհանրապես գոյություն չունի:
Փաստաբանի խոսքով, այսօր դատարանում հարցաքննված երկրորդ ոստիկանը՝ գործով վկա Լեւոն Գրիգորյանը, անգիր արած տեքստով է դատաքննական ցուցմունք տվել. «Այս վկայի ցուցմունքը հետազոտելիս դատարանում պարզվեց, որ քննիչը կեղծիք է թույլ տվել: Քննիչը տեսանյութը ցույց չէր տվել, բայց գրառել է, որ տեսանյութ է ցույց տալիս…Ինչը նշանակում է՝ քննիչը հարցաքննություն չի կատարել, ոստիկանը գնացել ու ստորագրել է, սա նշանակում է ՝ այս վկայի հարցաքննությունը անթույլատրելի ապացույց է»:
Կարդացեք նաև
Դատական նիստն այսօր հետաձգվեց՝ նշանակվելով հուլիսի յոթին:
Արփինե ՍԻՄՈՆՅԱՆ
