Քիչ առաջ ոստիկանության «Կումայրի» բաժնից Aravot.am-ին պատմեցին, որ այսօր անհասկանալի պատմություն է տեղի ունեցել Գյումրու Սլաբոդկա թաղամասի մահացած բնակիչներից մեկին դիահերձելու հետ կապված:
Մահացել է Գյումրու նախկին քաղաքապետ Վարդան Ղուկասյանի հարեւաններից մեկը՝ ծնված 1951 թվականին, սակայն վերջինիս հարազատներն ու հարեւանները, այդ թվում Վարդան Ղուկասյանի որդին՝ Սպարտակը, չեն թույլատրել դատաբժշկականում դիակը հերձեն՝ պատճառաբանելով, որ քրիստոնյային վայել չէ: Վերջիններս, հակաճառելով ու վիճաբանելով ոստիկանների ու դատաբժիշկների հետ, պաթանատոմիական կենտրոնից դիակը տարել են:
Սակայն քիչ անց Շիրակի մարզի դատախազ Րաֆֆի Ասլանյանի հանձնարարականով ոստիկանները գնացել ու դիակը տեղափոխել են դատաբժշկական դիահերձման: Ոստիկանության «Կումայրի» բաժին են հրավիրել նախկին քաղաքապետի որդուն՝ Սպարտակին, որն ասել է, թե ես որպես քրիստոնյա էի դեմ կանգնում դիահերձմանը, այլապես ոչ մի խնդիր չկա:
Aravot.am-ը Շիրակի մարզի դատախազ Րաֆֆի Ասլանյանից պարզաբանումներ խնդրեց այս թեմայի շուրջ: Դատախազը հաստատեց այս տեղեկությունները՝ նշելով, որ նման միջադեպ եղել է, եւ որ ինքը ոստիկանությանը հանձնարարություն է տվել անհապաղ դիակը վերադարձնել մարզային դատաբժշկական կենտրոն: Այժմ Շիրակի մարզի քննչական վարչությունում հանկարծամահության դեպքով նյութեր են նախապատրաստվում՝ դատաբժշկական փորձաքննության արդյունքում մահվան պատճառները պարզելու: Դիակի զննությամբ տեսանելի բռնության հետքեր չեն հայտնաբերվել:
Կարդացեք նաև
Նունե ԱՐԵՎՇԱՏՅԱՆ
