Լրահոս
Օրվա լրահոսը

«Հարկերից խուսափելով միլիոններ աշխատելով`միայն ապրիլի 2-ին թեկուզ 5 միլիոն ՊԲ-ին փոխանցելը, հայրենասիրություն չէ». Հայկ Մարության

Հուլիս 06,2016 18:06

Այսօր Կարեն Դեմիրճյանի անվան մարզահամերգային համալիրում «Ամարաս» ջոկատի կամավորներին շնորհակալագրեր հանձնվեցին Պաշտպանության նախարարության և «Կարմիր բերետներ 5165» ռազմահայրենասիրական համահայկական հ/կ-ի կողմից:

Ջոկատը համալրվել էր, քանի որ կային Արցախյան ազատամարտի տարիների կամավորներ և երիտասարդներ, որոնք միացան ապրիլյան քառօրյա պատերազմին:

IMG_3794Ջոկատի հրամանատար Արթուր Ալեքսանյանը՝ Ամարասի Արթուրը, Aravot.am-ի հետ զրույցում նշեց, որ երբ զանգում էր տղաներին միջոցառմանը հրավիրելու համար, միանգամից հարցնում էին՝ հըն Ղարաբաղ ենք գնում, երբ իմանում էին, որ մրցանակ հանձնելու համար են կանչում՝ տխրում էին: Հրամանատարին ուրախացրեց այդ փաստը. «Կամավորականներով որոշել ենք, որ ամիսը մեկ անգամ գոնե հավաքվենք, կապ պահենք, իմանանք մեկս մյուսի խնդիրները, պետք եղած ժամանակ առաջին կանչով գնանք Արցախ:

IMG_3792Մենք միշտ գիտենք՝ քանի թուրքը կա, քանի Ղարաբաղի հարցը կա, պետք է մինչև վերջ միշտ պատրաստ լինենք»:

Hrant Toxatyan Ջոկատի անդամ, դերասան Հրանտ Թոխատյանը փաստեց, որ քառօրյա պատերազմը ցույց տվեց՝ գալիս է մի սերունդ, որ ոչնչով պակաս չէ իրենց սերնդից. « Երիտասարդ սերունդն իր պատրաստակամությամբ, «դուխով», էլ ավելի լավն է: Շատերը չէին հավատում: Մեր ժամանակ էլ մեզնից մեծերն ասում էին, որ բան լինի՝ էս երկիրն ով ա՞ պահելու, արի ու տես, որ 90-ականներին մի ամբողջ սերունդ ոտքի կանգնեց»:

Kargin HaykoԴերասան Հայկ Մարությանի համար հայրենասիրությունը Աստծո օրհնանք է, որ ի ծնե տրվում է կամ չի տրվում. «20 տարի առաջ ունեցել ենք հաղթանակ, 20 տարի մի փոքր քնել ենք և այսօր լիակատար արթնացել ենք: Բժիշկը, ուսուցիչը, բանվորը և այն մարդիկ, որ ամեն օր տանջվելով՝ արդար աշխատում են այս երկրի համար և ստանում են կոպեկներ, երբ գալիս է պահը, հագնում են զինվորական համազգեստը և կանգնում առաջին գծում: Ինձ համար հայրենասիրություն չէ, երբ ինչ որ մեկն աշխատելով միլիոնավոր գումարներ, հարկերից խուսափելով՝ գալիս է ապրիլի երկուսը, թեկուզ 5 մլն դոլար գումար է փոխանցում ՊԲ-ին, ինձ համար այդ մարդը հայրենասեր չէ. հայրենասիրությունը մեկ օրով չէ»:

Երաժիշտ Վազգեն Ասատրյանը Հայկ Մարությանի և Հրանտ Թոխատյանի հետ ակտիվ է եղել թիկունքային հարցերում. «Կոորդինացնողի դերում էինք: Մեր ծառայությունը ոչ թե միշտ սահմանին լինելն էր, այլ երկրորդ գործը, որ նույնպես կարևոր էր, տղաներին հասցնել, բերել այն ամենն, ինչ իրենց անհրաժեշտ էր»:

«Ամարաս» ջոկատի երրորդ դասակի հրամանատար Սամվել Դավթյանն ավելացրեց, որ ապրիլյան քառօրյա պատերազմի օրերին երիտասարդներն անփորձ չեն եղել. «Մեր երիտասարդներին միշտ սիրել եմ, բայց հիմա աչքիս ավելի բարձրացան: Թշնամին շատ նենգ է, ամեն րոպե պետք է պատրաստ լինենք մռութին հասցնելու: Իսկ մենք պատրաստ էինք պատերազմին, ասեկոսեներին պետք չէ հավատալ: Եթե պատրաստ չլինեինք, 18 տարեկան երեխաները չէին կարողանա հաղթանակ տանել»:

Արփի ԿԻՐԱԿՈՍՅԱՆ

 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2016
Երկ Երե Չոր Հնգ Ուրբ Շաբ Կիր
« Հուն   Օգո »
 123
45678910
11121314151617
18192021222324
25262728293031