«Անկախ նրանից, թե Բաքվում ինչ հույսեր են փայփայում, պետք է նշեմ, որ Բաքվում թող հույսեր չփայփայեն, ԼՂ-ն չի եղել, չկա ու չի լինի Բաքվի տիրապետության տակ: ԼՂ-ում Ադրբեջանի դրոշի տեղադրման մի տարբերակ կա, երբ պաշտոնական Բաքուն ճանաչի պաշտոնական Ստեփանակերտը, բացի ԼՂՀ-ում Ադրբեջանի դեսպանություն ու այլ երկրների դեսպանության նման իր գլխին կծածանվի ադրբեջանական դրոշը. Այլ տարբերակ չկա»,- այսօր ՀՀԿ գործադիր մարմնի նիստից հետո ասաց ՀՀԿ խոսնակ Էդուարդ Շարմազանովը:
Նա անդրադարձավ նաեւ ԼՂ հիմնահարցի կարգավորման շուրջ Պուտին- Օբամա հեռախոսազրույցին, ասաց՝ դրական են գնահատում. «Որովհետեւ երկու գերտերությունների ղեկավարներ, ԵԱՀԿ Մինսկի խմբի համանախագահներ այս հարցում ունեն համահունչ դիրքորոշում, այսինքն, այն կարծիքը, որ ԼՂ հիմնահարցում ռուս-ամերիկյան հակասություններ կան ու այն էլ խորքային, տեսանք՝ այդպես չէ: Գոնե պաշտոնական հաղորդագրությունը ցույց է տալիս, որ ԱՄՆ ու ՌԴ ղեկավարները խնդրի բացառապես խաղաղ կարգավորման կողմնակից են»:
Ըստ պարոն Շարմազանովի, հիմնական սկզբունքների շուրջ երեք համանախագահ երկրների դիրքորոշումն էլ համահունչ է. «Երեք համանախագահներն էլ գտնում են, որ թիվ մեկ խնդիրը խաղաղությունն է, որ պետք է կարողանանք մեր հասարակություններին պատրաստել ոչ թե պատերազմի, այլ՝ խաղաղության: Մեզ համար առաջնային է խաղաղության ամրապնդումը, ինչպես նաեւ ԼՂ ինքնորոշման ամբողջական իրացումը հանրաքվեի միջոցով, ԼՂ-ն պետք է կարողանա ամբողջապես իրացնել իր ինքնորոշման իրավունքը: ԼՂ-ն չի կարող լինել Ադրբեջանի կազմում:
Կարգավիճակի հարցը մեզ համար ամենակարեւորն է, մենք քարոզում ենք բացառապես խաղաղություն, տարածաշրջանը կշահի, եթե լինի խաղաղություն»:
Կարդացեք նաև
Արփինե ՍԻՄՈՆՅԱՆ
