«Հայաստանի համար ՆԱՏՕ-ն սպառնալիք չէ եւ չի կարող լինել, Հայաստանի իրական անվտանգության բանաձեւը գոյություն ունի միայն Հյուսիսատլանտյան դաշինքի սահմաններում»,- «Տեսակետ» մամուլի ակումբում պատասխանելով Aravot.am-ի հարցին՝ ասաց Քաղաքական եւ միջազգային հետազոտությունների հայկական կենտրոնի փորձագետ Ռուբեն Մեհրաբյանը: Քաղաքագետի համոզմամբ`այդ անդամակցության ճանապարհն է, որը բերելու է հակամարտությունների կարգավորում:
Անցած շաբաթ Երեւանում կայացավ ՀԱՊԿ ԱԳ նախարարների նիստը: Նիստից հետո հայտարարվեց, որ ՀԱՊԿ-ը առաջիկայում հրապարակելու է մինչեւ 2028 թվականի իր գործունեության ծրագիրը, որում ներառվելու է նաեւ դրույթ`ՀԱՊԿ անդամ երկրները դեմ են արտահայտվելու ՆԱՏՕ-ի`դեպի Արեւելք ընդլայնմանը`ՆԱՏՕ-ն հռչակելով սպառնալիք: Հայաստանը, ՀԱՊԿ անդամ է, բայց բավական արդյունավետ համագործակցում է ՆԱՏՕ-ի հետ:
Ռուբեն Մեհրաբյան
«Հայաստանի`երկու պարանի վրա խաղալու քաղաքականությունը, որը Վարդան Օսկանյանի կողմից անվանվեց կոմպլեմենտար, այլեւս լուրջ չի ընդունվում»,- ասում է քաղաքագետը`նկատելով, որ ԵԽ խորհրդարանական բոլոր վեհաժողովներում Հայաստանը ներկայանում է պատվիրակությունների այնպիսի ղեկավարներով, որոնք ընդգծված հակաարեւմտյան եւ ռուսամետ հայացքներ ունեն, «ռազմավարական դաշնակցի» պատճառով Հայաստանը հակավրացական եւ հակաուկրաինական քաղաքականություն է վարում. «Կանգնած ենք ռազմավարական շրջադարձի առջեւ: ՀԱՊԿ, ԵՏՄ զարմանահրաշ անվանումներով կազմակերպությունները Հայաստանին սպառնում են ճահճացում եւ պետականության կորուստ»:
Խնդիրը հայաստանյան է, բայց առայժմ քաղաքագետը ներսում չի տեսնում այն ուժը, որը այդ ռազմավարական շրջադարձը կիրականացնի: Բայց նկատում է` հասարակության մեջ գիտակցությունը կա եւ այն չի կարող իր անդրադարձը չունենալ:
Կարդացեք նաև
Քաղաքագետը հատկանշական է համարում այն, որ ՆԱՏՕ-ի այս գագաթաժողովը կայացավ Վարշավայում: 61 տարի առաջ ԽՍՀՄ-ի կողմից Վարշավայում ձեռք ստեղծվեց Վարշավյան պակտը: Նրա համոզմամբ, պատմության ընթացքը ցույց է տալիս, որ գնում է միասնական Եվրոպայի սահմանների ընդլայնման եւ Ուկրաինայի ու Վրաստանի նկատմամբ յուրահատուկ վերաբերմունքը խոսում է այն մասին, որ այս ամենն ավարտվելու է Եվրոպայի սահմանների ընդգծմամբ`ներառելով նաեւ Հայաստանը, որը գտնվում է Հարավային Եվրոպայում:
Այս գագաթաժողովում, հիշեցնենք, ԵՄ-ն եւ ՆԱՏՕ-ն համաձայնագիր կնքեցին`հիբրիդային սպառնալիքների դեմ: Սպառնալիքները Հարավից եւ Արեւելքից են`Իսլամական պետությունը, չկայացած պետությունների հիմնախնդիրը եւ ՌԴ-ն:
Մանրամասները`տեսանյութում
Նելլի ԳՐԻԳՈՐՅԱՆ
