Քառօրյա պատերազմն իր բացասական ազդեցությունն է թողել Հայաստան զբոսաշրջիկների հոսքի վրա:
«Հայելի» ակումբում լրագրողների հետ հանդիպմանը Հյուրանոցների ասոցիացիայի նախագահ Հակոբ Հակոբյանը նշեց, որ քառօրյա պատերազմի բացասական հետևանքներն ավելի շատ զգալի են եղել տարվա երկրորդ եռամսյակին. «Զբոսաշրջության աճ այս տարի արձանագրել չենք կարող: Ոլորտն այսօր գտնվում է դժվար վիճակում: Կարող եմ հստակ ասել, որ ոչ կազմակերպված տուրիզմի վրա քառօրյա պատերազմն ազդեցություն ունեցավ: Որոշ դեպքեր եղան, երբ նախապես պատվիրված այցելությունները չեղյալ հայտարարեցին: Օրինակ` մեկը մեզ նամակ էր գրել, թե ձեզ մոտ ֆորսմաժորային իրավիճակ է, և պատերազմի դեպքում դուք պարտավոր եք մեր գումարը վերադարձնել»:
«Արմենիա Թրավել» տուրիստական ընկերության տնօրեն Մարինե Կպրյանն իրենց ընկերության օրինակով հավաստիացրեց, որ քառօրյա պատերազմի օրերին տուրիստական խմբերը, որոնք ամրագրել էին Հայաստան այց, չեղյալ չեն հայտարարել:
Տիկին Կպրյանը պատմեց մի դեպք, երբ պատերազմից անմիջապես երկու օր հետո Անգլիայից խումբ էր եկել Հայաստան, ու պլանավորված էր այց Արցախ, ուստի չգիտեին` ինչպես վարվել խմբի հետ, հարց են տվել ղեկավարին` արդյոք ուզո՞ւմ են այցելել Արցախ, նրանք համաձայնել են, գնացել Արցախ ու բարեհաջող վերադարձել:
Կարդացեք նաև
Անդրադառնալով այն մտահոգություններին, թե Հայաստանում հանգստի կազմակերպումը անհամեմատ թանկ է հարևան Թուրքիայի կամ Վրաստանի համեմատ` պարոն Հակոբյանը հակադարձեց. «Եթե մի ոլորտում մենաշնորհ չկա, հյուրանոցների առաջարկն ավելի մեծ է, քան պահանջարկը, այդ դեպքում գները չեն կարող բարձր լինել: Միգուցե այլ երկրում այդ նույն հյուրանոցն ավելի էժան է տարբեր գործոններով պայմանավորված, բայց դա ոչ մի կապ չունի մեր ներքին տնտեսության հետ»:
Դառնալով սոցփաթեթների հանման վերաբերյալ վերջին օրերին շրջանառվող խոսակցություններին`պարոն Հակոբյանը հիշեցրեց, որ ժամանակին իրենք զգուշացրել են հավանական չարաշահումների մասին. «Ի՞նչն էր խանգարում ուղիղ դիմել հյուրանոց և ոչ թե տուրիստական ընկերություն: Ճիշտ չէ, որ բնակչությունը տուժի, ինչ է թե ինչ-որ մեկն ինչ-որ մի տեղ չարաշահում է կատարել»:
Տաթև ՀԱՐՈՒԹՅՈՒՆՅԱՆ
