Լրահոս
Օրվա լրահոսը

«Շատ հպարտ եմ, որ բասկերի լեզվով ֆիլմեր են ներկայացվում Հայաստանում». ռեժիսոր

Հուլիս 14,2016 22:11

Ավանդական քարե դաստակերտ՝ բասկերի գյուղական կյանքի ամրոց, որն իր հին պատերի ներսում պահպանում է խորհրդավոր ու հնագույն իմաստություններ: Ժամանակակից աշխարհի համար նման վայրում ապրելը մեկուսի ու դաժան է թվում: Տան բնակիչները հաճախ իրենց զգում են ճակատագրի թակարդում, որտեղ հայտնվել են ծնված օրից:

Թոմասի և Իշաբելի երեք զավակներից յուրաքանչյուրն իր ձևով է պայքարում այս իրականության դեմ՝ թաքնվելով հումորի հետևում, փախուստ գտնելով ճամփորդության մեջ կամ, ինչպես Ամայան, փորձելով ելք գտնել արվեստի գործերի միջոցով:

Ամայան փորձում է չխզել կապերն իր ժառանգությունից, բայց Թոմասը, որ մեծացել է երկաթյա ավանդույթի համաձայն, անկարող է Ամայայի կյանքն այլ կերպ հասկանալ, քան որպես վերջնական հեռացում այն տնից, որտեղ ապրել են իր ընտանիքի բազմաթիվ սերունդներ:

Ամայան հուսահատորեն փորձում է գեղարվեստական գործունեությունը համադրել նախնիների ժառանգության հետ՝ նույնիսկ ընդդիմանալով հոր համառ անհամաձայնությանը: Իսկ տատը՝ Ամաման, լուռ հետևում է, թե ինչպես է ծավալվում ընտանիքի ճակատագիրը, նույնիսկ երբ աշխարհն սկսում է խամրել աչքի առաջ…

Բասկ ռեժիսոր Ասիեր Ալտունայի «Ամամա» ֆիլմը ներկայացված է «Ոսկե ծիրան» Երևանի 13-րդ միջազգային կինոփառատոնի խաղարկային ֆիլմերի մրցույթում:

«Շատ հպարտ եմ, որ բասկերի լեզվով ֆիլմեր են ներկայացվում Հայաստանում: Տասը տարվա ընթացքում այդ լեզվով 3-4 խաղարկային ֆիլմ է նկարահանվել: Մենք դրանցում շատ ֆինանսներ չենք կարողացել ներդնել, սակայն մեր սիրտն ու հոգին ենք նվիրել, շատ ենք աշխատել դրանք ավելի լավը դարձնելու ուղղությամբ»,- այսօր լրագրողների հետ հանդիպման ժամանակ ասաց Ասիեր Ալտունան:

Ռեժիսորի համար «Ամամա»-ն առանձնակի նշանակություն ունի, քանի որ գյուղական կյանքին է անդրադառնում. «Ես ծնվել ու մեծացել եմ գյուղում, հետո շատերի նման տեղափոխվել եմ քաղաք: Այս ֆիլմում փորձել եմ «վերստեղծել» այն գյուղը, որտեղ ապրել եմ»,- նշեց Ասիեր Ալտունան:

Սիրանուշ ՀԱՅՐԱՊԵՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2016
Երկ Երե Չոր Հնգ Ուրբ Շաբ Կիր
« Հուն   Օգո »
 123
45678910
11121314151617
18192021222324
25262728293031