Մգրո Սարգսյանի անվան ազգագրական երգի-պարի «Մարաթուկ» համույթը հուլիսի 15-ին «Առնո Բաբաջանյան» համերգասրահում հանդես կգա հաշվետու համերգով:
«Համույթում տարբեր տարիքային խմբեր կան, ինչը վկայում է այն մասին, որ ազգագրական երգ ու պարի ոգին սահմաններ չի ճանաչում: Մենք ջանք ու եռանդ չենք խնայում ազգագրականի նկատմամբ առանձնակի սեր տածող կրտսեր և ավագ սերնդի ներկայացուցիչների մեջ հայրենասիրության գաղափարն ամրապնդելու համար»,- «Նոյյան տապան» լրատվական կենտրոնում այսօր լրագրողների հետ հանդիպման ժամանակ ասաց «Մարաթուկ» համույթի տնօրեն Հասմիկ Բաղդասարյանը:
«Ազգը պահպանվում է իր լեզվով ու մշակույթով,- հավելեց համույթի խմբավար Արուս Վանյանը.- իմ կարծիքով մենք ազգանվեր գործ ենք անում՝ սերունդներին փոխանցելով մեր ազգայինը՝ իր ողջ համ ու հոտով: Հպարտորեն ու ջանասիրաբար ենք անում մեր գործը, որպեսզի «Մարաթուկ»-ը հարատևի»:
Համույթի մենակատար Ավետիս Ասլանյանի համոզմամբ՝ արտերկրում գտնվող ցանկացած հայի համար երազանք է կանգնել «Մարաթուկ»-ի նման համույթի կողքին. «Մեզնից ամեն ինչ կարող են խլել, բայց մեր արվեստը չեն կարող: Մենք հիմա երգում ենք Մարաթուկի համար, իսկ վաղը Մարաթուկից երգելու ենք աշխարհի համար»,- ասաց նա:
Սիրանուշ ՀԱՅՐԱՊԵՏՅԱՆ
