«Ցեղակրոն» կուսակցության առաջնորդ Շանթ Հարությունյանի որդուն՝ Շահեն Հարությունյանին ոստիկանները պատրաստվում են բաժին տանել։
Այս մասին Aravot.am-ի հետ զրույցում հաստատեց Շահեն Հարությունյանը։ Նա ասաց, որ առավոտից ոստիկաններն իր բնակարանում են, եւ այս պահին սպասում են, որ Շահենը պատրաստվի եւ տանեն բաժին։ Խուզարկություն Հարությունյանի բնակարանում չի կատարվել։
Մեր հարցին՝ ի՞նչ հիմնավորմամբ են ոստիկանները նրան ոստիկանական բաժին տանում, Շահեն Հարությունյանն ասաց, որ իրեն այդ մասին իրավապահները ոչինչ չեն հայտնում։
Ոստիկանության լրատվական ծառայությունից որեւէ տեղեկատվություն չտրամադրեցին, թե ի՞նչ հիմքով են բերման ենթարկում Շահեն Հարությունյանին եւ այլ քաղաքացիներին․ «Կճշտենք, եւ ավելի ուշ կասենք»։
Կարդացեք նաև
Հիշեցնենք, որ այսօր առավոտյան Հիմնադիր խորհրդարանը հայտարարեց, որ զինված ապստամբություն է կազմակերպել, որի ընթացքում Էրեբունի վարչական շրջանում ոստիկանական բազա են գրավել, պատանդ են վերցրել ոստիկաններ գեներալ Եղիազարյանին եւ գնդապետ Օսիպյանին, կա մեկ զոհ ոստիկանության կողմից եւ վիրավորներ երկու կողմերից էլ։
Նելլի ԲԱԲԱՅԱՆ
