Այսօր Ծաղկաձորի մարզաբազայում կայացավ ՀՀ նախագահի մրցանակի համար «Լավագույն մարզական ընտանիք 2016» մրցույթի եզրափակիչ փուլի բացման արարողությունը:
Մրցաշարի գլխավոր կազմակերպիչ եւ պատասխանատու, ՀՀ սպորտի եւ երիտասարդության հարցերի փոխնախարար Խաչիկ Ասրյանը մասնակից ընտանիքներին ներկայացրեց ԼՂՀ ՊԲ N դիվիզիայի փոխհրամանատար, գնդապետ Արարատ Մելքումյանին եւ Մարտական Խաչ 1-ին աստիճանի ասպետին նվիրեց իր ձեռքի ժամացույցը
Գնդապետը ողջունեց մարզական ընտանիքներին՝ նշելով, թե շատ ուրախ է, որ ինչպես Արցախում, այնպես էլ Հայաստանում առողջ ապրելակերպը մտնում է հատկապես երիտասարդ ընտանիքների առօրյա: Իսկ Aravot.am-ի հետ զրույցում ասաց. «Լավագույն մարզական ընտանիք» մրցույթն, անկասկած, կենսական ու ռազմավարական անգնահատելի դերակատարություն կարող է ունենալ արդեն երկար տարիներ պատերազմական վիճակում ապրող ԼՂՀ-ի եւ Հայաստանի համար: Ես առաջին անգամ այս մրցույթի եզրափակչին ներկա լինելու առիթն ունեցա: Ուրախացնում է, որ ընտանիքների ծնողներն էլ երիտասարդ կամ միջին տարիքի են, իսկ երեխաները՝ 6-ից 17 տարեկան: Բոլորն էլ ֆիզիկական լավ պատրաստվածություն են ցուցաբերում, ինչը շատ կարեւոր է հայկական երկու պետությունների համար: Իսկ ավագ տարիքի տղաները, որոնք շուտով կհամալրեն Հայոց բանակը, արդեն իսկ իրենց ֆիզիկական պատրաստվածության աստիճանով գրեթե չեն զիջում այսօրվա մեր բանակի հերոս զինվորներին»:
Աշոտ ՀԱԿՈԲՅԱՆ
