«Իշխանություններն ադեկվատ չեն արձագանքում այսօրվա իրավիճակին, եւ ես այսօր այստեղ եկա հենց դրա համար, որ այդ մեսիջն ուղարկեմ: Երբ մարդիկ ստիպված են զենք վերցնել, դա նշանակում է շատ ու շատ քայլեր, որ իշխանություններն արել են, սխալ են: Մարդիկ հասկացան, որ չեն կարող իշխանափոխություն անել ընտրությունների միջոցով: Մարդիկ հասկացան, որ չեն կարող պահել Ղարաբաղը կոչեր անելով իշխանություններին: Եվ մի խումբ մարդիկ որոշեցին զենքով պայքարել»,-այսպիսի կարծիք հայտնեց այսօր Խորենացի փողոցում «Գլոբալիզացիայի եւ տարածաշրջանային հետազոտությունների կենտրոնի» ղեկավար Ստեփան Գրիգորյանը:
Մանրամասները` տեսանյութում
Գրիգորյանը նկատեց, որ այս պայքարը կշարունակվի հանրապետության տարբեր տեղերում, եթե իշխանությունները սխալ քայլ անեն. «Հիմա էս տղեքը տանում են լեգիտիմ պայքար: Լեգիտիմը, ես օրենքի մասին չեմ ասում, լեգիտիմ, նկատի ունեմ, որ նրանք ամբողջ Հայաստանում ունեն աջակցություն ժողովրդի կողմից: Ես դեմ եմ զենքերով պայքարին: Ես հորդորում եմ իշխանություններին՝ պետք չէ ուժային մեթոդներով խնդիրը լուծել, ոչինչ, թող երկար տեւի, քննարկենք, ձեւ գտնենք»:
Կարդացեք նաև
Aravot.am-ի հարցին՝ ի՞նչ պետք է անի իշխանությունը, պարոն Գրիգորյանն ասաց. «Ազատ են արձակում Ժիրայր Սեֆիլյանին»:
Դիտարկմանը, որ «Սասնա ծռեր» խումբը նաեւ Սերժ Սարգսյանի հրաժարականն է պահանջում, պարոն Գրիգորյանն ասաց. «Հրաժարականի մասին կխոսենք, թող Սեֆիլյանին ազատեն, լարվածությունը կթուլանա, հետո կանցնենք քաղաքական դաշտ: Դա էլ մենք բոլորս հասկանում ենք՝ սարքած գործով բռնած մարդ, ազատում ես ու կտեսնես ոնց մթնոլորտը կփոխվի: Իշխանափոխության գործընթացը սկսվել է, եթե դա իշխանությունները չեն հասկանում, մենք դա մոտ ժամանակներս կտեսնենք: Իրենք են արագացնում այդ գործընթացը»:
Նելլի ԲԱԲԱՅԱՆ
