Տավուշի մարզի Բերդի տարածաշրջանի սահմանամերձ Չորաթան գյուղի բնակիչ Գագիկ Հովհաննիսյանը դատի է տվել նույն գյուղում արտադրական գործունեության ծավալած «Տավուշ տեքստիլին» ՍՊԸ-ին: Նա քաղաքացիական հայց է ներկայացրել իր հարկադիր պարապուրդում գտնվելու ամբողջ ժամանակահատվածում աշխատավարձ հաշվարկելու եւ բռնագանձելու պահանջով: Սույն հայցով դատավարությունը ներկայումս ընթանում է Տավուշի մարզի ընդհանուր իրավասության առաջին ատյանի դատարանում:
«Տավուշ տեքստիլ» ընկերությունը հիմնադրել է ռուսաստանաբնակ գործարար, ծնունդով սահմանամերձ Արծվաբերդ գյուղից Սուրեն Երիցյանը: Նա Չորաթանում բանվորական ձեռնոցների արտադրամաս է ստեղծել: 2015թ. հուլիսի 24-ին այդ արտադրամաս է այցելել Սերժ Սարգսյանը:
Սուրեն Երիցյանը նախկինում մեզ հետ զրույցում սխալ էր համարել, որ ձեռնոցների արտադրության համար հումք ներկրելիս ինքը դրա արժեքի 20 տոկոսը վճարում է, իր աշխատողների աշխատավարձի 20 տոկոսը որպես եկամտահարկ է վճարում: Շահութահարկի վճարման արտոնությունից օգտվող գործարարը դա սահմանագոտում ներդրումներ կատարած ընկերության համար պետության կողմից էական օգնություն չէր համարել:
Ոսկան ՍԱՐԳՍՅԱՆ
