Լրահոս
Օրվա լրահոսը

«ԵՄ ծրագրերը Հայաստանում կկրեն շարունակական բնույթ». ԵՄ պաշտոնյա

Հուլիս 26,2016 10:01

ՀՀ գյուղատնտեսության նախարար Սերգո Կարապետյանը նախօրեին ընդունել է  Հայաստանում ԵՄ պատվիրակության  արտաքին համագործակցության  պատասխանատու Ջոն Բարքերին:

Հանդիպման սկզբին կողմերը քննարկել են Եվրամիության աջակցությամբ Հայաստանում իրականացվող ծրագրերը: Ընդգծելով, որ այդ ծրագրերը մեծապես նպաստել են Հայաստանում գյուղատնտեսության բնագավառի զարգացմանը` նախարար Կարապետյանը հույս է հայտնել, որ այսուհետ ևս ԵՄ-ն կշարունակի աջակցություն ցուցաբերել մեր երկրում ագրարային ոլորտի զարգացմանը:

Այս համատեքստում նախարարը հատկապես կարևորել է նորաստեղծ կոոպերատիվներին աջակցելու անհրաժեշտությունը:

«Կոոպերացիան մեր երկրի գյուղատնտեսության զարգացման հիմնական գրավականն է, ուստի հարկավոր է միջոցներ ձեռնարկել այս շարժման խթանման և նոր կոոպերատիվների ձևավորման ուղղությամբ», – նշել է նախարարը:

Բարձր գնահատելով հատկապես վերջին տարիներին Հայաստանի և Եվրամիության միջև ձևավորված սերտ հարաբերությունները` պարոն Բարքերը վերահաստատել է, որ ԵՄ ծրագրերը Հայաստանում կկրեն շարունակական բնույթ, և առաջիկա ծրագրերն առավելապես ուղղված կլինեն փոքր տնտեսությունների խթանմանն ու պարենային անվտանգության ապահովմանը: Նա նաև հույս է հայտնել, որ ԵՄ ծրագրերի շնորհիվ նպաստավոր պայմաններ կստեղծվեն երկրում կոոպերացիայի խթանման համար:

Հանդիպման ընթացքում անդրադարձ է կատարվել նաև Երևանում անցկացվող ամենամյա «Գյուղական կյանքի և ավանդույթների» փառատոնի ընթացիկ աշխատանքներին: Փառատոնը կազմակերպվում է ՀՀ գյուղատնտեսության նախարարության և Երևանի քաղաքապետարանի աջակցությամբ «Կանաչ արահետ» հասարակական կազմակերպության կողմից:

Ջոն Բարքերը հավելել է, որ այս տարի փառատոնին իրենց արտադրանքը կներկայացնեն նաև ԵՄ կողմից իրականացվող ծրագրերի շրջանակում ստեղծված կոոպերատիվները:

Հանդիպման ընթացքում քննարկվել են երկկողմ հետաքրքրություն ներկայացնող այլ հարցեր ևս:

ՀՀ գյուղատնտեսության նախարարության տեղեկատվության և հասարակայնության հետ կապերի բաժին

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2016
Երկ Երե Չոր Հնգ Ուրբ Շաբ Կիր
« Հուն   Օգո »
 123
45678910
11121314151617
18192021222324
25262728293031