Զարուհի Փոստանջյանը մի խումբ քաղաքացիների հետ տոպրակներով սնունդ է տարել Խորենացի փողոց եւ ցանկանում էր փոխանցել այն ՊՊԾ գունդը գրաված «Սասնա ծռեր» խմբավորման անդամներին: Սակայն, ոստիկանները չթողեցին առաջանալ՝ նշելով, որ այդ մուտքից ոչինչ չպետք է մտնի եւ խնդրեցին ազատել մուտքը: Սակայն ցուցարարները հայտարարեցին, որ ոչ մի տեղ չեն գնալու:
«Հենց հիմա զանգեք ձեր վերադասին եւ ասեք, որ ես այստեղ եմ եւ սնունդը փոխանցելու պահանջ եմ ներկայացնում»,- ասաց Զարուհի Փոստանջյանը: «Դուք ոստիկանապետ ունե՞ք, եթե ունեք, խնդրում եմ դիմեք իրեն՝ ասեք, որ Զարուհի Փոստանջյանը իր հետ խոսելու, խնդրանքով ներկայանալու հարց ունի»,- շարունակեց պատգամավորը:
Զարուհի Փոստանջյանը որոշ ժամանակ պատասխան չստանալուց հետո հետաքրքրվեց, թե ոստիկաններին արդյոք չեն սովորեցրել, որ մարդուն երկար ժամանակ չպետք է սոված թողնել, եւ որ ոստիկանների պարտականությունների մեջ է մտնում այդպիսի օգնություն ցուցաբերել նրանց: Ոստիկանը պատասխանեց, որ կարող է պատգամավորի հետ զրուցել:
Կարդացեք նաև
«Այս պահին մենք այստեղ ենք ոչ միայն որպես պաշտոնյաներ, այլ նաեւ որպես Հայաստանի Հանրապետության քաղաքացիներ եւ մարդ»,- պատասխանեց Զարուհի Փոստանջյանը:
Մի խումբ ցուցարարներ շարունակեցին մնալ մուտքի դիմաց՝ ձեռքներին սնունդով լի տոպրակներ:
Ամի ՉԻՉԱԿՅԱՆ
