Այսօր Խորենացի փողոցում ԱԻՄ առաջնորդ Պարույր Հայրիկյանը հիշեցրեց, որ ինքն էլ է ժամանակին Մարդու իրավունքների պաշտպանի դեր կատարել. «Երբ 1998-2002-ը ես հասարակական կարգով զբաղեցում էի մարդու իրավունքների պաշտպանի պաշտոնը, մի մարդու բանտից ազատելու հարց կար: Ես նրան չէի էլ համակրում, բայց նա քաղկալանավոր էր: Դիմեցի Քոչարյանին, որ մեր պետության համար խայտառակություն է քաղկալանավոր ունենալը: Նա ասաց՝ այդ մարդը ավանտյուրիստ է: Ես ասացի՝ եթե դու ուզում ես ունենալ այդ քաղկալանավորը, ես չեմ կարող լինել մարդու իրավունքների պաշտպան այս պետության մեջ»:
Հայրիկյանը հորդորեց օմբուդսմեն Արման Թաթոյանին իր օրինակին հետեւել. «Թող գնա դիմի երկրի նախագահին, ասի՝ լսի, այսպես չի կարելի: Նրանք այնքան բարձր գտնվեցին, որ պատանդ կոչվողների առանց որեւէ նախապայմանի ազատ արձակեցին, հիմա դու նրանց մի կտոր հացի՞ց ես զրկում: Ինքը իր կոչման համաձայն պիտի գնա նախագահի մոտ ու ասի՝ կա՛մ ես հենց հիմա ուտելիք եմ տանում այդ մարդկանց եւ ջուր, կամ ես այլեւս այստեղ չեմ աշխատի»:
Հռիփսիմե ՋԵԲԵՋՅԱՆ
