Հոգեբան Ռուբեն Աղուզումցյանի հավաստմամբ` անսովոր այս իրավիճակում չի կարելի սովորական մեթոդներով գործ անել:
«Հայելի» ակումբում, դառնալով երկրում ստեղծված իրավիճակին, հոգեբանը փաստեց, որ այն ոչ թե այսօրվա, երեկվա կամ երկու շաբաթ առաջվա իրադրությամբ է պայմանավորված, այլ վաղուց է կուտակվել ու հանգեցրել այս ամենին:
Ըստ պարոն Աղուզումցյանի` հայ ժողովրդի հոգեբանական մթնոլորտը ծանր է. «Դրա ակունքները միայն այս նոր երևույթները չեն, ապրիլյան պատերազմը տարրերից մեկն է»:
Ռուբեն Աղուզումցյանը փաստեց, որ պատճառներից է նաև վատ կառավարման համակարգը. «Կառավարիչների մեջ կան մարդիկ, որոնք չպետք է լինեին կառավարման համակարգում, սրան գումարվեց նաև մարդկային գործոնը»:
Կարդացեք նաև
Հոգեբանը տեղեկատվության պակասը ևս բացասական գործոն է համարում ու հավելում. «Մյուս բացասական գործոնը տրված որոշ հրամաններն էին, որոնց պատճառով կատարված գործողությունները հակառակ ազդեցությունն ունեցան»:
Իսկ թե այս իրավիճակը ով պետք է կարգավորի, պարոն Աղուզումցյանն այս առիթով ասաց. «Այս ծանր հոգեբանական մթնոլորտի լավացումը միայն իշխանությունից կամ անհատներից չէ կախված, այլ համատեղ աշխատանք է պահանջվում»:
Տաթև ՀԱՐՈՒԹՅՈՒՆՅԱՆ
