Փաստաբան Հայկ Ալումյանը խիստ բացասական է գնահատում այսօր ՊՊԾ գնդի հարակից տարածքից` Խորենացի փողոցից, քաղաքացիներին զանգվածային բերման ենթարկելը:
Aravot.am-ի հետ զրույցում պարոն Ալումյանը հայտնեց, որ եթե այս գործերը հասնեն Մարդու իրավունքների եվրոպական դատարան (ՄԻԵԴ) ընդդեմ Հայաստանի վճիռների տարափ կլինի քաղաքացիներին ապօրինաբար ազատություններից զրկելու հետ կապված:
Ըստ նրա`հետևողական լինելու դեպքում ՄԻԵԴ-ում կարելի կլինի հասնել հաղթանակի, անգամ նրան, որ ՀՀ-ն տվյալ անձանց կրած ոչ միայն ֆիզիկական, այլև բարոյական վնասները կփոխհատուցի, և պատասխանատվության կենթարկվեն նրանք, որոնք այդ հրահանգները տալիս են:
Փաստաբանը մանրամասնեց. «Ուղղակի այդ հարցով պետք է հետևողականորեն զբաղվել: Այժմ տեսնում եմ զանգվածային ձերբակալումներ, կալանավորումներ, բայց համոզված եմ, որ այդ դեպքերի անգամ մեկ տոկոսը Եվրոպական դատարան չի հասնելու»:
Կարդացեք նաև
Մեր հարցին` ի՞նչ պատճառով, պարոն Ալումյանը պատասխանեց. «Չգիտեմ`իրականում պատճառը որն է, որ այդքան քիչ գանգատներ են Հայաստանից հասնում ՄԻԵԴ, բայց իմ դատողությունները հիմնում եմ մինչև հիմա եղած իրավիճակի վրա»:
Խիստ բացասական գնահատելով այսօր Խորենացի փողոցում կատարված զանգվածային բերման ենթարկումները` պարոն Ալումյանը մտահոգություն հայտնեց նաև ՀՀ Մարդու իրավունքների պաշտպանի աշխատանքի հետ կապված. «Բացասական եմ գնահատում Մարդու իրավունքների պաշտպանի պասիվ դիրքորոշումը, զարմանում եմ միջազգային կառույցների լռությունից»:
Տաթև ՀԱՐՈՒԹՅՈՒՆՅԱՆ
Մանրամասները` վաղվա տպագիր «Առավոտ»-ում
