Ցուցարարները փորձեցին խլել բարձրախոսը, ապա վիճեցին
Քիչ առաջ Խորենացի փողոցում հավաքված ցուցարարներին դիմեց «Հիմնադիր խորհրդարանի» անդամ Հարություն Աղլամազյանը. «Այսօր ոստիկանությունը ցանկանում էր վախի մթնոլորտ սերմանել` մեզ բերման ենթարկելով անգամ «Տաշիր» առեւտրի կենտրոնի մոտից, որպեսզի չգանք այստեղ: Բայց մենք համախմբվեցինք, եկանք այստեղ»:
Նա անդրադարձավ Գյումրիում կայացած բողոքի ցույցին, որը ցուցարարները ծափերով ողջունեցին: Աղլամազյանն առաջարկեց շարունակել նստացույցը եւ մարդկանց կոչ անել միանալ իրենց: Այս կոչը քաղաքացիները ողջունեցին, իսկ ահա մյուս տարբերակին` հեռանալ Խորենացի փողոցից, չարձագանքեցին:
Կարդացեք նաև
3-րդ տարբերակը, ըստ Աղլամազյանի, հետեւյալն է. «Ոստիկաններին հնարավորություն ենք տալիս հանել հագուստը եւ միանալ ժողովրդին»: Այս առաջարկը միանշանակ չընդունվեց, մի քանի ցուցարարներ փորձեցին խլել բարձրախոսը, ապա վիճեցին, թե ով է ելույթ ունենալու, հետո «մեռնեմ քեզ, ոնց որ չենք հասկանում իրար» ասելով` մի կողմ հեռացան: Կողքից լսվում էր՝ «ձեր անիմաստ պահանջի պատճառով ժողովուրդը ցրվում ա, արա…»
Նստացույցը Խորենացի փողոցում շարունակվեց մինչեւ ցույցի կազմակերիչներն իրար լսեցին, ապա եկան եւ հայտարարեցին, որ որոշել են գնալ եւ վաղը երեկոյան ժամը 8-ին հավաքվել Ազատության հրապարակում :
Լուիզա ՍՈՒՔԻԱՍՅԱՆ
