Ոստիկանությունը երեկ բերման էր ենթարկել նաեւ երգիչ, երգահան Եղիշե Պետրոսյանը: Նա Aravot.am-ին տեղեկացրեց, որ իրենց բերման էին ենթարկել ոստիկանության զորքերի 1033 զորամաս:
«Անընդհատ մարդկանց թիվն ավելանում էր, ինչ որ մարդկանց բաց էին թողնում, ինչ-որ մարդիկ ավելանում էին: Ես հասկացա, որ նպատակն էր՝ ինչքան ակտիվ քաղաքացի կա բերել այնտեղ, աչքները վախեցնել»,- ասաց նա:
Եղիշե Պետրոսյանը նշեց, որ իր, «Ժառանգություն» կուսակցության փոխնախագահ Արմեն Մարտիրոսյանի, «Նոր Հայաստան» միավորման անդամ Անդրիաս Ղուկասյանի եւ մի շարք փորձառու քաղաքական գործիչների ներկայությունը սաստում էր ոստիկաններին: Նա ընդգծեց, որ ոչ մի այլանդակություն չի տեսել՝ բացի ցինիզմից. «Այդ ամեն ինչը ցինիզմի դրսեւորում է, մարդկանց լցնեն «կարտոշկի» նման տեղափոխեն այնտեղ, անմարդկային պայմաններում, ավտոմատների եւ մասկաների տակ տպավորություն ստեղծեն»:
Խնդրեցինք մանրամասնել, թե ինչպես են քաղաքացիներին տեղափոխել ոստիկանության զորքերի զորամաս, Եղիշե Պետրոսյանը պատասխանեց. «Սովետական փլատակ մեքենայով, բնականաբար,փակ ճաղերով, որովհետեւ նույնիսկ օդ չկար շնչելու, բերանը ծռելով խոսելով՝ չգիտես՝ դա պետության ներկայացուցիչ է, թե ինչ-որ մի հատ չգիտեմ ով՝ գիտեք՝ բերանը ծռելով, որ խոսում են: Ահավոր շոգ, մինչեւ տեղ հասանք ամբողջ հագուստս ջուր էր եւ ոչ միայն իմը: Այնտեղ երեւի թե նստեցնում են ավելի շատ քանակով մարդկանց, քան կարելի է, օդ չկա շնչելու»:
Կարդացեք նաև
Ոստիկանությունը երեկ Խորենացի փողոցից քաղաքացիներին բերման ենթարկելիս հայտարարում էր, թե բերման է ենթարկում միայն ցույցի մասնակիցներին, իսկ մյուս քաղաքացիներին, պարզապես տանում են ոստիկանական պատնեշից այն կողմ՝ ինքնությունը պարզելու: Aravot.am-ը Եղիշե Պետրոսյանից հետաքրքրվեց, թե արդյոք ոստիկանությունը այդպե՞ս է գործել, նա պատասխանեց. «Սուտ է, բացարձակ սուտ է. եթե կարողանան ծիտ բռնեն, ծտին էլ կտանեն: Այնտեղ հրահանգ է իջեցված՝ով այդ կողմերում կերեւա վերցրեք տարեք, որպեսզի աչքերը վախենան, բայց իրենք չգիտեն, որ վախեցողը այդտեղ չի էլ գալիս, այդտեղ գալիս է այն մարդը, որ այդ ամեն ինչից չի վախենում»:
Ամի ՉԻՉԱԿՅԱՆ
