Երեկ ոստիկանությունը Աբովյան-Սայաթ Նովա փողոցների խաչմերուկից բերման է ենթարկել «Քաղաքացիական պայմանագիր» կուսակցության վարչության մի քանի անդամների եւ 3,5 ժամ պահելուց հետո բաց է թողել:
Կուսակցության վարչության անդամ Ալեն Սիմոնյանը Aravot.am-ին ասաց հետեւյալը. «Մենք, ես ինքս, մեր բողոքն էինք հայտնում Խորենացի փողոցում ոստիկանության ապօրինի գործողությունների դեմ, երբ Խորենացի փողոցում մարդկանց ձեռքերը ոլորած բերման են ենթարկում: Մենք մեր ակցիան անցկացրինք ժամը 18.30-19.00-ի սահմաններում՝ Աբովյան-Սայաթ Նովա փողոցների խաչմերուկում, որպեսզի ցույց տանք ընդհանուր իրավիճակը երկրում, որ միայն Խորենացի փողոցը չէ, որտեղ այդ պահին տեսախցիկները ցույց են տալիս, թե մարդ չկա, բոլորը գոհ են եւ իրենց ոչ մի բան չի անհանգստացնում: Ոստիկանները մեզ բերման ենթարկեցին: Բայց չգիտես ինչու, ապօրինի զենք եւ զինամթերք պահելու կասկածանքով, երբ մենք ընդամենը փակել էինք խաչմերուկը»:
Հարցին, թե որքան ժամանակ են անցկացրել ոստիկանությունում, Ալեն Սիմոնյանը պատասխանեց. «Երեքուկես ժամ պահելուց հետո բաց թողեցին»:
Ալեն Սիմոնյանը դժվարացավ ասել, թե հետագայում ինչ են անելու՝ ասելով, թե դա կախված է լինելու, թե հետագայում ինչ իրադարձություններ տեղի կունենան:
Կարդացեք նաև
Աշոտ ՀԱԿՈԲՅԱՆ
Լուսանկարները՝ Սարգիս ԱԼԵՔՍԱՆՅԱՆԻ
