«Իշխանությունն սթափեցնում է նրանց, ովքեր չեն պատկերացնում՝ ինչ վատ կառավարվող երկրում են իրենք ապրում»

«Իշխանությունն սթափեցնում է նրանց, ովքեր չեն պատկերացնում՝ ինչ վատ կառավարվող երկրում են իրենք ապրում»

«Եթե ըստ իրենց պատճառահետևանքային կապերի ենք դիտարկում «Սասնա ծռեր» խմբի գործունեությունն ու իրականացրած գործողությունը, ապա սա գործողություն չէ մի խումբ մարդկանց կողմից իշխանություն զավթելու և երկրում ինչ-որ իրավիճակ ստեղծելու՝ սեփական քմահաճույքների կամ անձնական բարեկեցության համար, ինչպես որոշ վայ մարդիկ և վայ լրատվամիջոցներ են փորձում որակել: Սա գործողություն է երկրում թելադրված իրավիճակով, որը շատ ավելի տագնապալի է, քան այն, ինչ հիմա անում է «Սասնա ծռեր»-ը ՊՊԾ գնդում»,- «Երկու երես» մամուլի ակումբում այսօր լրագրողների հետ հանդիպման ժամանակ այսպիսի տեսակետ հայտնեց գրականագետ Արքմենիկ Նիկողոսյանը:

Նրա ձևակերպմամբ՝ «Սասնա ծռեր»-ի իրականացրած գործողությունը մեր հասարակության մի զգալի մասի ներքին ցանկությունների, մղումների, սպասումների նյութականացած տեսքն է:

«Այսօր շատ են խոսում քաղաքական մոտեցումներով, համերաշխության մթնոլորտում հարցերը լուծելու մասին, բայց այս տարիների ընթացքում, ինչ Սերժ Սարգսյանը նախագահում է մեր երկրում, բոլոր այդ տեսակ միջոցները փորձվել են (ընտրությունների միջոցով հասնել ինչ-որ արդյունքների, երկիրը փոխել, ավելի լավ վիճակ ստեղծել երկրի համար, քաղաքական մոտեցումներով փորձել ինչ-որ բաների հասնել), բայց տեսել ենք, որ ստեղծված է մի այնպիսի համակարգ, որ բոլոր ողջամիտ, դեմոկրատական, քաղաքական մոտեցումները, փաստորեն, դատապարտված են:

Որքան էլ ցավալի է, այնուամենայնիվ պետք է նշել, որ, ըստ էության, միակ տարբերակը մնում էր այն, ինչ արել են «Սասնա ծռեր» խմբի անդամները: Գուցե միջոցների մեջ ինչ-որ դատապարտելի բան գտնեն մարդիկ, գուցե գործողության ինչ-ինչ փուլերում լինեն դատապարտելի բաներ, բայց ընդհանրության մեջ նրանք արել են այն, ինչ կուզեինք անել երևի թե մեծ մասս, եթե ունենայինք հնարավորություն, ինչու չէ նաև խիզախություն ու կամք»,- նշեց Արքմենիկ Նիկողոսյանը:

Ինչ վերաբերում է տարբեր մարդկանց պահանջ-հորդորներին, որ «Սասնա ծռեր» խմբի անդամները պետք է ողջամտություն դրսևորեն, արյուն չթափվի և այլն, Նիկողոսյանը կարծում է, որ դրանք նախևառաջ պետք է իշխանություններին ուղղվեն:

«Առաջին օրվանից սկսած՝ տեսանք, որ եթե կար մեկը կամ մի խումբ, որը սրում էր երկրում իրավիճակը, մեր իշխանություններն էին՝ ոստիկանության ամենատարբեր գործողություններով: Հենց առաջին օրը տեսանք բազմաթիվ անօրինական ձերբակալություններ, երեկ էլ, դրա նախորդ օրն էլ:

Ինչո՞ւ եմ ասում՝ սա սրում է: Որովհետև մեր երկրում մի խավ կա, որն անտարբեր է բոլոր իրադարձությունների հանդեպ, իր համար հանգիստ ապրում է: Այդ մարդկանց փողոցներից տանելը, ձերբակալելը նյութականացած զգացնել է տալիս, թե իրենք իրականում ինչ երկրում են ապրում: Իշխանությունը սթափեցնում է բոլոր նրանց, ովքեր չեն պատկերացնում՝ ինչ վատ կառավարվող երկրում են իրենք ապրում, որպեսզի նրանք էլ սկսեն պայքարել այդ նույն իշխանության դեմ»:

Դառնալով հաճախ հնչող այն մտահոգություններին, թե այս նեղ վիճակում սրում են մեր երկրի ներքին քաղաքական կյանքը, դրանից կարող են օգտվել մեր թշնամիները, Նիկողոսյանն ասաց, որ այդ կոչ-հորդորները ևս պետք է իշխանություններին հասցեագրել:

«Ինչո՞ւ պետք է «Սասնա ծռեր»-ը, ցուցարարները, ՀՀ քաղաքացիներն անընդհատ մտածեն վիճակը չսրելու մասին, իսկ իշխանությունները չպե՞տք է մտածեն: Իշխանությունները նախևառաջ պիտի դրա մասին մտածեն և երկրում այնպիսի մթնոլորտ, իրավիճակ ստեղծեն, որ նման գործողություններ չկատարվեն: Իր երկիրը սիրող իշխանությունը չէր վարվի այնպես, ինչպես մեր իշխանություններն են վարվում վերջին տարիներին և հատկապես վերջին տասներկու օրերին»,- եզրափակեց Արքմենիկ Նիկողոսյանը:

Սիրանուշ ՀԱՅՐԱՊԵՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք