Այսօրվա կառավարության նիստում աշխատանքի և սոցիալական հարցերի նախարար Արտեմ Ասատրյանը որոշման նախագիծ ներկայացրեց՝ սուբսիդավորելու համար անապահով ընտանիքների էլեկտրաէներգիայի սակագնի թանկացումը:
Վարչապետ Հովիկ Աբրահամյանը բացատրեց, որ այս տարվա օգոստոսի մեկից էլեկտրաէներգիայի սակագինը էժանանում է 2.50 դրամով, բայց այն ընտանիքները, որոնք ամսական մինչև 250 կՎտ ժամ էլեկտրաէներգիա էին ծախսում, նախորդ տարվա օգոստոսի մեկից սուբսիդավորվում էին կառավարության և Տաշիր ընկերության կողմից, իսկ հիմա նպաստառու ընտանիքների համար էլեկտրաէներգիան թանկանալու է 4.35 դրամով, այդ պատճառով էլ կառավարությունը որոշում է այդ ծախսը վերցնել իր վրա: Նախագծի նպատակն է աղքատ ընտանիքների համար փոխհատուցել էլեկտրաէներգիայի դիմաց ավելի վճարումով պայմանավորված ծախսերի ծավալների մեծացումը և հնարավորինս աջակցել:
«Հարցը քննարկել ենք նաև հանրապետության նախագահի հետ և այդ ծախսը կառավարությունը վերցնում է իր վրա»,- ասաց Հովիկ Աբրահամյանը՝ ավելացնելով, որ այդ նպատակով պետբյուջեից այս տարի կհատկացվի 567 մլն դրամ, իսկ գալիք տարի՝ 1 մլրդ 157 մլն դրամ:
Այս որոշմամբ այս ընտանիքների նպաստի չափը բարձրացավ ընդամենը 1000 դրամով, որով, ըստ վարչապետի, հնարավորինս կհատուցվի շուրջ 112300 ընտանիքների էլեկտրաէներգիայի դիմաց ավելի վճարումով պայմանավորված լրացուցիչ ծախսերը: Մասնավորապես, 1000 դրամով բարձրանում է ընտանեկան նպաստի բազային մասը, սոցիալական նպաստը և եռամսյակային հրատապ օգնությունը:
Կարդացեք նաև
Նելլի ԲԱԲԱՅԱՆ
