Լեզվաբան Դավիթ Գյուրջինյանը վստահ է, որ շուտով ՊՊԾ գնդի ներսում գտնվող բժիշկները կմիանան մեզ: «Հայելի» ակումբում լրագրողների հետ հանդիպմանը նա այս առիթով նշեց`հստակ չգիտենք, որ բժիշկները պատանդ են. «Բժիշկներից մեկի մայրն ասում է, որ տղան ասել է` իր վիճակը լավ է, ինքը պատանդ չէ: Այնտեղ ավելի լավ պատանդներ կային. օրինակ`Օսիպյանը…բայց նրանց բաց թողեցին, ուստի բժիշկներին վստահաբար նեղություն չեն տա, ուրեմն անելիք կա: Իրավաբան չլինելով ենք զգում, որ հազիվ պաշտոնյա ոստիկաններ կային իրենց մոտ, բայց բաց թողեցին խաղաղ ճանապարհով, մարդկային էր ու մեզանից ոչ մեկ էլ չէր կասկածում, որ նրանց գլխից այնտեղ մազ չի պակասի, և բժիշկները շուտով կմիանան մեզ»:
Դառնալով այն փաստին, որ միայն ՊՊԾ գնդի ներսում գտնվող բժիշկներին է սնունդ փոխանցվել և ոչ «Սասնա ծռերի» անդամներին` պարոն Գյուրջինյանը դա որակեց այսպես. «Դա մարդկային չէ և մարդասիրությունից հեռու է: Հետո էլ պիտի ասենք, թե բժիշկը երդում է տվել Հիպոկրատին, մարդասիրական քայլ է անում: Ժամանակն ամեն ինչ տեղը կդնի»:
Լեզվաբանը մտահոգված է, որ իշխանությունները ժողովրդի հետ սրտաբաց չխոսեցին, այլ ընդհակառակը` «հրավիրում էին» ոստիկանություն. «Այդ հրավիրելը լինում էր բռնությամբ, անհիմն, մենք բազմաթիվ տեսանյութերում ականատես էինք լինում, թե ինչպես նշանավոր գեղանկարչի գլուխը սեղմելով` մտցնում էին մեքենա, 70-նն անց կնոջ թևերը ոլորած էին տանում: Ուզում եմ մտածել, թե նա ի՞նչ կարող էր անել, եթե խաղաղ նստած էր այնտեղ: Տեսանք, թե ինչպես երկու հենակներով երիտասարդին չորս ոստիկաններ «փառավոր» գրկած տանում էին ոստիկանություն, էլ չասեմ, թե ինչպես էին բերման ենթարկում երիտասարդ աղջիկներին ու այդ ընթացքում ասում էին` «հարգելիս»: Այս օրերին այդ դիմելաձևը խայտառակ ձևով արժեզրկվեց»:
Իսկ թե ինչու մերժվեց մտավորականների հայտնի նամակը, պարոն Գյուրջինյանը նշեց. «Մտավորական բառի իմաստն էլ պետք է հասկանալ: Ամեն դիպլոմավոր մարդ մտավորական չէ, մտավորականը գլխում պետք է միտք ունենա, մտքի ոլորտում պիտի աշխատի, էլ չեմ ասում բարոյական նկարագրի մասին: Այդ դիմումն էլ մերժվեց ժողովրդի կողմից, քանի որ դա էլ նրա սրտի հետ չխոսեց»:
Կարդացեք նաև
Տաթև ՀԱՐՈՒԹՅՈՒՆՅԱՆ
