Մարդու իրավունքների պաշտպանի գրասենյակի աշխատակիցներն առաջիկայում էլ կայցելեն «Հիմնադիր խորհրդարանի» ձերբակալված անդամ Ալեք Ենիգոմշյանին եւ կուսումնասիրեն նրա պահման պայմանները: Այս մասին այսօր «Հոդված 3» մամուլի ակումբում հայտնեց ՄԻՊ մամուլի խոսնակ Զոհրապ Եգանյանը: Նա հիշեցրեց, որ ՄԻՊ աշխատակիցներն այսօր էլ այցելել են նրան:
«ՄԻՊ աշխատակազմը շարունակում է աշխատել արտակարգ ռեժիմով: Միայն հեռախոսով ստացած ահազանգերի թիվն անցնում է 120-ը: Դրանք հիմնականում վերաբերել են բերման ենթարկվելու դեպքերին: Քաղաքացիները պնդում էին, որ բերման ենթարկվելուց խախտվել են իրենց իրավունքները: Մեզ համար վարույթ սկսելու հիմք են հանդիսացել նաեւ ԶԼՄ-ների հրապարակումները: Արդեն իսկ որոշ գործեր մեր կողմից ուղարկվել են ՀՔԾ` մասնավորապես Դավիթ Սանասարյանի եւ Վաղինակ Շուշանյանի մասով: Որոշ գործեր ուղարկվել են դատախազություն»,-ամփոփելով վերջին օրերի աշխատանքը` ասաց ՄԻՊ խոսնակը:
Զոհրապ Եգանյանն արձագանքեց նաեւ «Սասնա ծռեր» զինված խմբի անդամներից Պավել Մանուկյանի եւ նրա որդու` Արամ Մանուկյանի փաստաբան Ինեսսա Պետրոսյանի առաջարկին, այն է` միջնորդել, որպեսզի մի խումբ լրագրողների հետ միասին պաշտպանը մուտք գործի դատապարտյալների հիվանդանոց, որտեղ, ըստ փաստաբանի, նվաստացուցիչ պայմաններում է պահվում Արամ Մանուկյանը: Փաստաբանը լրագրողներին առաջարկեց ՄԻՊ-ի միջնորդությամբ նկարահանել Արամ Մանուկյանի պահման պայմանները:
Կարդացեք նաև
«Առաջարկը կփոխանցեմ պաշտպանին»,-ասաց Եգանյանը:
Լուիզա ՍՈՒՔԻԱՍՅԱՆ
