Լրահոս
Օրվա լրահոսը

Սամվել Ֆարմանյան. «Զինված խմբի կողմից զենքը վայր դնելն ու հանձնվելը որեւէ մեկի պարտությունը չէ»

Հուլիս 31,2016 22:38

ԱԺ Հանրապետական պատգամավոր Սամվել Ֆարմանյանն իր ֆեյսբուքյան էջում գրում է:
«Անկախության 25-րդ տարում տեղի ունեցածը մեր պետականության հասունության կարեւորագույն մի քննություն էր: Զինված խմբի կողմից զենքը վայր դնելն ու հանձնվելը որեւէ մեկի պարտությունը չէ. դա ժողովրդի, հասարակության և պետության միասնական հաղթանակն է: Նոր արյունից խուսափելու՝ խմբի անդամների որոշումը եւս հասունության եւ սթափության լուրջ վկայություն է:

Չհաշված Խորենացու փողոցում եւ Սարի թաղում տեղի ունեցած բախումները, որոնք անշուշտ լուրջ հետաքննության կարիք ունեն, Հայաստանի Հանրապետության իրավապահ մարմինները դրսևորեցին բացառիկ զսպվածություն եւ արհեստավարժություն: Չնայած առկա բոլոր նախադրյալներին, չհայտարարվեց արտակարգ իրավիճակ: Չնայած մեծ գայթակղությանը և ոստիկանության սպայի սպանությանը, ուժայինները չգնացին գրոհի և զինյալ խմբի նկատմամբ չկիրառեցին անհամաչափ ուժ: Չնայած հանրային լայն ակնկալիքներին, ընտրվեց համբերատար բանակցությունների և երկխոսության ուղին: Առողջապահության նախարարությունն ապահովեց բոլոր տուժածներին համաչափ և որակյալ բուժօգնություն` անկախ նրանից, թե որ կողմն էր ներկայացնում տուժողը:

Այն, որ հասարակությունը ակնկալում է լուրջ և խորքային բարեփոխումներ` փաստ է, այդ արմատական փոփոխությունները մեր երկրում, իրականում, այլընտրանք էլ չունեն: Բայց հասկանալի է նաև, որ զենքով հնարավոր է ստեղծել միայն քաոս, ոչ՝ առաջընթաց: Հայաստանն այդպիսի շռայլության հնարավորություն էլ չունի:
Մենք, որպես իշխանություն, պարտավոր ենք մի կողմից լրջորեն հասկանալ և անդրադառնալ ժողովրդի կողմից այս ակնհայտորեն անընդունելի պայքարի ձևն առնվազն հանդուրժող, իսկ հաճախ` սատարող դիրքորոշման պատճառները և հրատապ գտնել դրանց պատասխանները: Պարտավոր ենք նաև ապահովել զինված խմբի անդամներից յուրաքանչյուրի արդար դատավարության իրավունքը: Հաշվեհարդարը պետք է բացառվի: Այդ ամենին զուգահեռ Հայաստանը պետք է բռնի անհրաժեշտ և վաղուց հասունացած փոփոխությունների ճանապարհը:

Մենք, որպես հասարակություն, պետք է ճիշտ գնահատենք քաղաքացիական հասարակություն եզրույթը: Բոլորիս բառապաշարից պետք է իսպառ վերացվի վրեժխնդրության, արյունահեղությունը արդարացնելու, ուժին ուժով պատասխանելու գայթակղությունը: Բոլորս միասին պետք է սովորենք նույնիսկ ծայրագույն լարվածության պարագայում` իր հոգևոր ծառայությունը կատարելու համար ամենաթեժ կետ եկած հայ եկեղեցու սպասավորին չվիրավորելու, Մանսուրյանին և Չեքիջյանին երբեք չպիտակավորելու աքսիոմաները: Քանի որ առանց հոգևոր արժեքների և մտավորական էլիտայի որևէ ժողովուրդ դատապարտված է:

Մնում է աղոթել անմեղ զոհված ոստիկանների համար և արագ ապաքինում մաղթել բոլոր վիրավորներին՝ զինյալներ, ոստիկաններ, խաղաղ ցուցարարներ, թե լրագրողներ:

Ուրեմն, առաջ դեպի ավելի ուժեղ Հայաստան, դեպի մեր բոլորի երազած Հայաստան, որի քաղաքացի լինելը պատիվ է, որի բանակում և ոստիկանությունում ծառայելը` պատվաբեր առաքելություն, որտեղ ծնվող երեխաների առջեւ բաց են առաջընթացի բոլոր հնարավորությունները:

Անկախության 25-րդ տարեդարձը մենք նշում ենք հենց այսօր այս խորհրդանշական ձեռքբերմամբ»:
Aravot.am-ը ՀՀԿ-ական պատգամավորից հետաքրքրվել էր, թե ինչպես է մեկնաբանում Սասնա ծռերի՝ զենքը վայր դնելու որոշումը:

Լուսինե ԲՈՒԴԱՂՅԱՆ

 

 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2016
Երկ Երե Չոր Հնգ Ուրբ Շաբ Կիր
« Հուն   Օգո »
 123
45678910
11121314151617
18192021222324
25262728293031