Ազատության հրապարակից մեկնարկած բողոքի երթը քիչ առաջ ավարտվեց Ազատության հրապարակում: Հանրահավաքի փոքրաթիվ մասնակիցներից միայն մի քանիսը եկան Ազատության հրապարակ:
Հիշեցնենք, որ երթուղին Հյուսիսային պողոտայով դեպի Մաշտոցի պողոտա, Ամիրյան փողոց, Հանրապետության հրապարակով էր անցնելու, իսկ ավարտվելու էր Ազատության հրապարակում:
Ինչպես հավաքի մասնակիցներն էին այսօր ավելի վաղ հայտարարել, վաղը կրկին նույն ժամին, նույն տեղում են հավաքվելու, ամենայն հավանականությամբ նրանց կմիանա «Հիմնադիր խորհրդարանի» անդամ, արդեն ազատության մեջ գտնվող Ալեք Ենիգոմշյանը:
Այսօր հրապարակում հանրահավաքին ելույթ ունեցողներից մեկն էլ «Ղարաբաղ» կոմիտեի անդամ Աշոտ Մանուչարյանն էր:
Կարդացեք նաև
Ըստ նրա. «Մեզ մի հարց է տրված՝ ի վիճակի ենք ամբողջականացնել այս հրապարակը, ապահովել պայմաններ, որ ողջ ժողովուրդը ոտքի ելնի»:
Նա պատմեց, որ Արցախյան ազատամարտի մասնակիցների հետ է խոսել, նրանց համար ՀՀ-ում ստեղծված իրավիճակն անընդունելի է, ու նրանք կարծիք են հայտնել, որ իրավիճակը պետք է արագ հանգուցալուծում ստանա. «Ժողովրդի բոլոր արդար պահանջները պետք է բավարարվեն… Արցախի բանակը հայ ժողովրդի հետ է»:
Ըստ նրա, իրենց են միացել նաեւ Հայաստանի արվեստի գործիչները, որոնք մոտ օրերս մի նշանաբանով՝ «Ազատություն քաղբանտարկյալներին», մեծ համաժողովրդական համերգ են անցկացնելու:
Պարոն Մանուչարյանն իր խոսքը եզրափակեց հետեւյալ նախադասությամբ. «Եթե այս հրապարակը չաշխատեց, եթե չհամախմբվենք, Հայաստանը երբեք չի կարողանա դառնալ անկախ երկիր»:
Արփինե ՍԻՄՈՆՅԱՆ