Ռիո դե Ժանեյրոյում Հայաստանի օլիմպիական հավաքականի հետ անհասկանալի ինչ-որ բան է կատարվում: Սկզբում մրցելույթների ժամանակ վնասվածքներն էին հետապնդում մեր մարզիկներին, հիմա էլ օվկիանոսից այն կողմ հազարավոր կիլոմետրեր մեկնած օլիմպիականները չեն ելնում մեկնարկի: Առաջինը լողորդուհի Մոնիկա Վասիլյանն էր, որն ըստ պաշտոնական հայտարարության մարզման ժամանակ վնասվածք է ստացել: Երեկ նրան միացավ հեռացատկորդ Գոռ Ներկարարյանը, որի մասնակցությանը սպասող հայ մարզասերները միայն վերջին պահին տեղեկացան, որ նրան մրցասպարեզում չեն տեսնելու: Իսկ մինչ այդ, հավանաբար, հեռացատկորդի մեկնարկից ժամեր առաջ ՀԹՖ նախագահ Ռոբերտ Էմմիյանը ՀԱՕԿ-ի լրատվականին տված հարցազրույցում վստահեցրել էր, թե մեր թեթեւ աթլետները Ռիոյին լավ են հարմարվել ու իրենց լավ են զգում:
Aravot.am-ը Ներկարարյանի չմասնակցելու պատճառը փորձեց ճշտել ՀԹՖ գլխավոր քարտուղար Նարինե Շահբազյանից, որն ինչպես պարզվեց, օլիմպիական խաղեր չի մեկնել եւ հիմա արձակուրդում է: «Ես ինքս շատ զարմացած եմ, բայց որեւէ տեղեկություն այս պահի դրությամբ չունեմ: Երեկվանից փորձում եմ հեռախոսակապ հաստատել ֆեդերացիայի նախագահի հետ, բայց չի ստացվում: Հիմա Բրազիլիայում դեռ գիշեր է: Սպասում եմ՝ այնտեղ լույսը բացվի: Հենց մի բան իմանամ, կտեղեկացնեմ», – ասաց Նարինե Շահբազյանը:
Հ. Գ. Հետաքրքիր է, որ Գոռ Ներկարարյանի մրցման չներկայանալուց արդեն անցել է շուրջ 12 ժամ, իսկ Ռիո դե Ժանեյրոյից դրա պատճառի մասին պաշտոնական տեղեկություն չկա:
Աշոտ ՀԱԿՈԲՅԱՆ
Կարդացեք նաև
Լուսանկարը՝ armnoc.am-ի
Երևի քյաբաբի պակասն իր դերն է խաղում