Լրահոս
Օրվա լրահոսը

«Ոստիկաններին ով սպանել է, թող նա էլ աջակցի ընտանիքներին». «Սասնա ծռերի» համար դրամահավաքի կազմակերպիչ

Օգոստոս 18,2016 17:31

«Սասնա ծռերի» անդամներ Արամ և Պավլիկ Մանուկյանների համար դրամահավաքի արդյունքում հավաքվել է 1.330.000 դրամ, Արմեն Լամբարյանի համար` 450.000 դրամ, Մհեր Մազմանյանի համար` 433.000 դրամ:

Aravot.am-ի հետ զրույցում «Սասնա ծռերի» ընտանիքների համար դրամահավաքի աջակցության կազմակերպիչ, քաղաքացիական ակտիվիստ Նելլի Մինասյանը տեղեկացրեց, որ այսօր երեկոյան էլ Հյուսիսային պողոտայում նախաձեռնում է դրամահավաք ի աջակցություն «Սասնա ծռեր» խմբի անդամ Սեդրակ Նազարյանի:

Նա հավաստիացրեց, որ հավաքված գումարը փոխանցում է անձամբ խմբի անդամների ընտանիքներին. «Նրանց բոլորի ընտանիքներն էլ գտնվում են սոցիալապես ծայրահեղ ծանր վիճակում: Նախատեսել եմ բոլորի համար էլ կազմակերպել նման դրամահավաքներ: Հավաքված գումարը յուրաքանչյուր դրամահավաքից հետո հենց Հյուսիսային պողոտայում փոխանցում եմ նրանց ընտանիքների անդամներին: Մհեր Մազմանյանի համար հավաքված գումարով անձամբ վճարել եմ նրա տան չորս ամսվա սննդի վարձը, նա ունի 6 անչափահաս երեխա: Արմեն Լամբարյանի ընտանիքում կա 3 անչափահաս երեխա, նրանք նույնիսկ գումար չունեն, որ գան Երևան` Արմենին սնունդ փոխանցեն»:

Նելլի Մինասյանը նշեց, որ դրամահավաքին մասնակցել են հիմնականում սովորական քաղաքացիները: Մեր հարցին` որևէ գործարար մասնակցե՞լ է դրամահավաքին, Նելլի Մինասյանը փոխանցեց, որ մասնակցել են բացառապես սովորական քաղաքացիները:

Հետաքրքրվեցինք` հնարավո՞ր է դրամահավաք նախաձեռնեն զոհված ոստիկանների ընտանիքների համար, Նելլի Մինասյանը վրդովվեց. «Զոհված ոստիկաններին թող աջակցի պետությունը, ով նրանց սպանել է: Իսկ «Սասնա ծռեր» խմբի որևէ անդամ ոստիկանների սպանության հետ որևէ կապ չունի: Ով սպանել է, թող նա էլ աջակցի»:

Հիշեցնենք, որ ոստիկաններից երկուսը սպանվել են «Սասնա ծռերի» անդամների հետ փոխհրաձգության հետեւանքով: Ու այդ մասին այսօր «Հայելի» ակումբում լրագրողների հետ հանդիպմանը հայտարարել էր «Սասնա Ծռեր» շարժման քաղաքական խորհրդի անդամ Ալեք Ենիգոմշյանը: Նա մասնավորապես նշել էր. «Ճիշտ է` երեք ոստիկան է սպանվել:  Միանգամից ասեմ, որ երեք ոստիկաններից մեկի սպանությունը բացարձակապես կապ չունի «Սասնա ծռեր»-ի հետ, եթե ես չեմ սխալվում, նաև այդ առումով մեղադրյալ չկա: Փաստ է, որ երեքից մեկը «Սասնա ծռերի» գործողությունների արդյունքում չի սպանվել: Մյուս երկուսն իրենց վերքերը ստացել են փոխհրաձգության ժամանակ, մենք ունեցել ենք նաև բազմաթիվ այլ վիրավորներ, որոնք իրենց կյանքերը չեն կորցրել, և այդ երկու ոստիկանները, բնականաբար,  միակ զոհերը չեն: Այո, նրանք իրենց կյանքերն են տվել: Այնտեղ եղել է փոխհրաձգություն, պաշտպանություն և դրա արդյունքում զոհվել է երկու ոստիկան: Զուտ մարդկային առումով ես հերթական անգամ իմ ցավն եմ հայտնում այդ զոհերի կապակցությամբ և ցավակցություն եմ հայտնում նրանց  հարազատներին և մտերիմներին»:

Նաեւ հիշեցնենք, որ Նելլի Մինասյանը նախկինում կալանավորված էր Նորք-Մարաշում Ազգային անվտանգության ծառայության կողմից վնասազերծված խմբի գործով:

Տաթև ՀԱՐՈՒԹՅՈՒՆՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Օգոստոս 2016
Երկ Երե Չոր Հնգ Ուրբ Շաբ Կիր
« Հուլ   Սեպ »
1234567
891011121314
15161718192021
22232425262728
293031