Լրահոս
Օրվա լրահոսը

ՀՀ բնապահպանության նախարար. լիարժեք չեն գործում Սեւանա լճի հարակից տարածքներում ջրի մաքրման կայանները

Օգոստոս 23,2016 16:48

ՀՀ բնապահպանության նախարար Արամայիս Գրիգորյանն ընդունել է ԱՄՆ Միջազգային զարգացման գործակալության /USAID/ հայաստանյան առաքելության նորանշանակ տնօրեն տիկին Դեբորա Գրիսերին, Հայաստանում ԱՄՆ փոխդեսպան Ռաֆիկ Մանսուրին և ԱՄՆ միջազգային զարգացման գործակալության աշխատակիցներին:

ՀՀ բնապահպանության նախարարը ողջունելով հյուրերին` շնորհավորել է Դեբորա Գրիսերին և փոխդեսպան Ռաֆիկ Մանսուրին իրենց պաշտոններում նշանակվելու կապակցությամբ և հաջողություն մաղթել Հայաստանում իրականացվելիք իրենց գործունեության մեջ: Արամայիս Գրիգորյանը բարձր է գնահատել Հայաստանում USAID-ի ծավալած գործունեության` մասնավորապես ՀՀ բնապահպանության նախարարության հետ համագործակցության մակարդակը:

Անդրադառնալով ջրի ազգային պաշարների և մասնավորապես` Արարատյան դաշտավայրում ստորերկրյա քաղցրահամ ջրերի խնայողության և արդյունավետ կառավարման խնդրին` Արամայիս Գրիգորյանը շեշտել է այս ուղղությամբ USAID-ի կողմից արդեն իսկ իրականացրած և ընթացքի մեջ գտնվող ծրագրերի արդյունավետությունը, այդ թվում նաև Հարավային ջրավազանային կառավարման պլանի մշակման գործում գործակալության ցուցաբերած աջակցությունը: Ըստ բնապահպանության նախարարի, դրանք կարևոր նախադրյալներ են հետագա համատեղ աշխատանքներն շարունակելու համար: Այս համատեքստում Արամայիս Գրիգորյանը կարևորել է մեկնարկած «Գիտական առաջադեմ տեխնոլոգիաների օգտագործում և համագործակցություն հանուն ռեսուրսների համալիր պահպանության»/ԳԱՏՕ/ ծրագրի շրջանակներում ԱՄՆ միջազգային զարգացման գործակալության, Կոկա-Կոլա Հելլենիկ Բոթլինգ Քամփնի Արմենիա ընկերության և ՀՀ բնապահպանության նախարարության միջև ստորագրված փոխըմբռնման հուշագիրը:

Պատվիրակության խնդրանքով Արամայիս Գրիգորյանը ներկայացրել է վերջին երկու տարիների ընթացքում ՀՀ բնապահպանության նախարարության կողմից Արարատյան դաշտավայրում ստորերկրյա քաղցրահամ ջրի խնայողության ուղղությամբ կատարված աշխատանքը, ինչի արդյունքում հաջողվել է խնայել 1մլրդ 400 մլն մ³ ջուր: Անդրադառնալով ձկնաբուծարանների կողմից ջրի օգտագործման խնդրին` Արամայիս Գրիգորյանը տեղեկացրել է, որ ՀՀ գյուղատնտեսության նախարարության հետ միասին աշխատանքներ են տարվում ընկերություններում ջրի օգտագործման փակ և կիսափակ համակարգերի ներդրման, ինչպես նաև օգտագործված ջուրը հետագայում ոռոգման նպատակով կիրառելու մեխանիզմների ներդրման ուղղությամբ: «Բայց Արարատյան դաշտավայրում ստորերկրյա քաղցրահամ ջրի խնդրի արդյունավետ կարգավորման համար անհրաժեշտություն է ջրի օգտագործման ավտոմատ կառավարման համակարգի ներդրումը: Այս նպատակով արդեն իրականացվել են պիլոտային ծրագրեր, ինչը փաստում է, որ այս միջոցով է հնարավոր լիարժեք կանոնակարգել ստորերկրյա քաղցրահամ ջրերի օգտագործումը: Խնդիրն արդիական է հատկապես գլոբալ կլիմայական փոփոխությունների արդյունքում արդեն արձանագրվող անցանկալի հետևանքների համատեքստում»,- հավելել է Արամայիս Գրիգորյանը:

ԱՄՆ Միջազգային զարգացման գործակալության /USAID/ հայաստանյան առաքելության տնօրեն տիկին Դեբորա Գրիսերը բարձր է գնահատել USAID-ի և ՀՀ բնապահպանության նախարարության միջև առկա համագործակցության մակարդակը, համոզմունք հայտնելով, որ հետագայում նույնպես այն կշարունակվի:
ՀՀ բնապահպանության նախարարը պատվիրակության ղեկավարի ուշադրությունը հրավիրել է նաև Սևանա լճի խնդիրներին: Նշելով, որ ՀՀ կառավարությունը գործուն քայլեր է ձեռնարկում լճի մակարդակը բարձրացնելու նպատակով, Սակայն լիարժեք չեն գործում լճի հարակից տարածքներում ջրի մաքրման կայանները և խնդրեց աջակցել խնդրի լուծման հարցում: Մաքրման կայանների առկայությունը հնարավորություն կտա Սևանա լիճը պահպանել որպես լիարժեք էկոհամակարգ և խմելու ջրի պաշար:
Տիկին Դեբորա Գրիսերը հավաստիացրել է, որ կդիտարկեն հարցը և իրենց սահմանափակ միջոցները կօգտագործեն խնդրի լուծման համար ավելի մեծ ներդրողներ ներգրավելու համար:

USAID-ի հայաստանյան առաքելության տնօրենը պատրաստակամություն է հայտնել շարունակել ՀՀ բնապահպանության նախարարության և ԱՄՆ Միջազգային զարգացման գործակալության միջև համագործակցությունը` առավել սերտացնելով այն: Կողմերը կարևորել են ջրային ռեսուրսների արդյունավետ և նպատակային օգտագործման գործընթացում Արարատյան արտեզյան ավազանի ավտոմատ կառավարման համակարգի ներդրման ուղղությամբ համագործակցության ինտենսիվացումը:

 

ՀՀ բնապահպանության նախարարություն 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Օգոստոս 2016
Երկ Երե Չոր Հնգ Ուրբ Շաբ Կիր
« Հուլ   Սեպ »
1234567
891011121314
15161718192021
22232425262728
293031