Ուկրաինայի խորհրդարանում առաջարկում են պաշտոնանկ անել երկրի ներքին գործերի նախարար Արսեն Ավակովին: Առաջարկի հեղինակը «Պետրո Պորոշենկո բլոկի» պատգամավոր Սերգեյ Կապլինն է: Գերագույն ռադայի պաշտոնական կայքէջը հայտնում է, որ նրա ներկայացրած նախագիծը փոխանցվել է խորհրդարանի ղեկավարության քննարկմանը: Նախագծի տեքստը չի հրապարակվել:
Ըստ ուկրաինական «Կորեսպոնդենտ» պարբերականի, ներքին գործերի նախարարին ցանկանում են պաշտոնանկ անել իրավական համակարգի անբավարար բարեփոխումների պատճառով, իսկ առիթը Կրիվոյե Օզերով ավանում վերջերս տեղի ունեցած սպանությունն է, որը մեծ աղմուկ է առաջացրել:
Օգոստոսի 24-ին Նիկոլաևսկի շրջանի Կրիվոյե Օզերո ավանում ոստիկանները տեղացի մի քաղաքացու բերման ենթարկելու ժամանակ դաժանորեն ծեծել են նրան, տրավմատիկ ատրճանակից մի քանի անգամ կրակել նրա կրծքին, ինչի հետևանքով նա մահացել է: Այս միջադեպը հասարակական մեծ արձագանք է առաջացրել, բնակավայրում ինքնաբուխ հավաքներ, անկարգություններ են սկսվել:
Մանրամասներին կարող եք ծանոթանալ` «Ազատություն» ռ/կ-ի կայքում
