Վերաքննիչ քրեական դատարանում օգոստոսի 29-ին նույն ժամին քննվում էին Հիմնադիր խորհրդարանի առաջնորդ Ժիրայր Սեֆիլյանի եւ «Սասնա ծռեր» խմբավորման անդամ Գագիկ Եղիազարյանի խափանման միջոցների դեմ բողոքները: Ի տարբերություն Ժիրայր Սեֆիլյանի ՝ Գագիկ Եղիազարյանը ներկա էր դատական նիստին:
Տասնյակ քաղաքացիներ պաստառներով հավաքվել էին Վերաքննիչ դատարանի առաջ: Սկզբում նրանք վանկարկում էին դատարանի շենքի դիմաց, սակայն, շուտով ցուցարարների մի մասը բարձրախոսով մտավ դատարանի շենքի նախամուտք եւ շարունակեց վանկարկումները:
Եղիազարյանի պաշտպան Մուշեղ Շուշանյանը դատական նիստից հետո լրագրողների հետ զրույցում հայտնեց, որ դատարանը մերժել է կողմի բողոքը: Դատարանը մերժել է նաեւ գրավ կիրառելու վերաբերյալ կողմի միջնորդությունը. «Մենք պնդում էինք, որ բացակայում է հիմնավոր կասկածը, որ Գագիկ Եղիազարյանը կատարել է այն արարքները, որոնք իրեն մեղսագրվում են: Ավելի ճիշտ՝ նախաքննության մարմինը, որը պարտավոր է հիմնավոր կասկածը հաստատելու համար դատարանին ներկայացնել ապացույցներ, չի ներկայացրել որեւէ ապացույց, որի հիման վրա հնարավոր կլիներ կասկածի առկայության վերաբերյալ եզրահանգում անել»:
Կարդացեք նաև
Գագիկ Եղիազարյանին երկու մեղադրանք է առաջադրվել՝ ապօրինի կերպով հրազեն, ռազմամթերք ձեռք բերելը, կրելը, պահելը եւ շենքեր, շինություններ զավթելը. «Երկու մեղադրանքով էլ որեւէ ապացույց չկար, որ հիմնավոր կասկած կա: Ավելին՝ կային ապացույցներ, որոնց հիման վրա մենք պնդում ենք, որ դատարանը կարող էր հետեւություն անել, որ հիմնավոր կասկածը բացակայում է:
Մասնավորապես՝ Ազգային անվտանգության ծառայությունը հուլիսի 27-ին հաղորդագրություն էր տարածել՝ համաձայն որի Գագիկ Եղիազարյանը հանձնվել է իրավապահ մարմիններին: Ես հայտարարեցի, որ մենք չենք պնդում՝ դա իրականության մեջ այդպես է եղել, թե ոչ, բայց եթե հիմք ենք ընդունում Ազգային անվտանգության ծառայության հաղորդագրությունը, ապա նշանակում է, որ Քրեական օրենսգրքի համապատասխան հոդվածի ուժով Գագիկ Եղիազարյանը պետք է ազատվի քրեական պատասխանատվությունից»:
Ամի ՉԻՉԱԿՅԱՆ
