«Նաիրիտ» գործարանի համար ներդրող է հայտնվել, որը պատրաստ է 150 միլիոն դոլար ներդնել` գործարանը վերագործարկելու համար: Սակայն, չգիտես ինչու, Սլովակիայի գործարար Աշոտ Գրիգորյանի առաջարկին Հայաստանում լուրջ չեն վերաբերվում: Այսօր «Պոստ սկրիպտում» մամուլի ակումբում «Նաիրիտի» նախկին տնօրեն Կարեն Իսրայելյանն ասաց, երբ գործարարը ժամանել է Հայաստան բանակցելու, նրան փոխնախարարի մակարդակով են ընդունել, որն ի պաշտոնե նույնիսկ չի համակարգել այդ ոլորտը: Ավելին՝ պետական պաշտոնյան գործարարին ծանոթացրել է «Նաիրիտի» տնօրենի հետ եւ արդյունքներով այլեւս չի հետաքրքրվել:
Գործարանի մի խումբ աշխատակիցներ արդեն քանի ամիս է՝ կառավարության առաջ բողոքի ակցիաներ են կազմակերպում` պահանջելով` «Նաիրիտի» վերագործարկում: Նրանք համոզված են, որ գործարանն աշխատեցնելով մեր երկիրը տնտեսական մեծ օգուտներ կստանա, հարյուրավոր աշխատատեղեր կբացվեն:
Նաիրիտցիների խոսքերով, ներդրող Աշոտ Գրիգորյանը, որը նաեւ Եվրոպական հայերի ֆորումի նախագահն է, պատրաստ է նախ 20 միլիոն ներդնել, ապա 70 եւ մնացածը: Եվ քանի որ պետական մակարդակով ներդրողին լսող չկա, ապա գործարանի աշխատակիցները ներդրումային իրենց ծրագիրն են առաջարկում, որը քննարկել են Աշոտ Գրիգորյանի հետ:
Կարդացեք նաև
Կարեն Իսրայելյանի խոսքերով, քանի որ մեր երկիրն այլեւս միջպետական բանկի առաջ որեւէ պարտավորություն չունի, ինչպես որ վստահեցրել է Էներգետիկայի նախկին նախարար Երվանդ Զախարյանը, ապա ճիշտ կլինի, որ «Նաիրիտի»` պետության, գազի, էլեկտրաէներգիայի ընկերությունների նկատմամբ ունեցած պարտք- պահանջները մի քանի տարով սառեցվեն, որպեսզի ներդրողը սկսի գործարանն աշխատեցնել եւ աստիճանաբար պարտքերը մարել:
Նախկին տնօրենի համոզմամբ, եթե կառավարությունը համաձայնի «Նաիրիտը» վերագործարկել, ապա գազի հարցն էլ կարող է հեշտությամբ լուծվել. «Մեր պայքարի իմաստն այն է, որ կառավարությունն ընդունի այս ֆինանսական ընկերությանը, լսի, ընդհանուր հայտարարի գան, մնացածը տեխնիկական հարցեր են, որոնք կլուծվեն: Իրանական կողմի կառավարության հետ կարելի է բանակցել եւ կոնկրետ նպատակի համար գազ բերել»:
Ասուլիսի ողջ ընթացքին ներդրող Աշոտ Գրիգորյանը «Skype»-ով հետեւում էր:
Լուսինե ԲՈՒԴԱՂՅԱՆ
